სასუქის დეფიციტი და გაძვირებული სათესლე მასალა - სამცხე-ჯავახეთში საგაზაფხულო სამუშაოები დაიწყო

ფოტო:არქივი

სამცხე–ჯავახეთის მექანიზაციის სერვის ცენტრში სულ 32 ტრაქტორია, მათგან მხოლოდ 12 მუშაობს, დანარჩენი მწყობრიდან გამოსულია.

მიუხედავად ამისა, ცენტრის ხელმძღვანელი მათე ლონდარიძე ამბობს, რომ ფერმერების მოთხოვნებს სრულად აკმაყოფილებენ: „ჯავახეთში ჯერჯერობით არ არის დაწყებული სამუშაოები, დანარჩენ მუნიციპალიტეტებში მიმდინარეობს. ახლა ძირითადად ხვნაზეა მოთხოვნა. რამდენიც მოგვმართავს იმდენს დავეხმარებით. დღის განმავლობაში, დაახლოებით ერთი ან ორი ტრაქტორი მუშაობს“.

მისივე თქმით, ამ ეტაპზე ცენტრს ტრაქტორის მოთხოვნით ახალციხის, ადიგენისა და ასპინძის მუნიციპალიტეტებიდან აკითხავენ.

ტექნიკის პრობლემა არ აქვთ, მაგრამ შხამ-ქიმიკატების ნაკლებობას უჩივიან ახალქალაქის მუნიციპალიტეტში. აქ კარტოფილის ჯერ არ ითესება, თუმცა მარცვლეული კულტურების თესვა დაწყებულია. ფერმერები ამბობენ, რომ მათ უმრავლესობას საკუთარი ტრაქტორი ჰყავთ, თუმცა საგანგებო მდგომარეობის გამოცხადებისა და გადაადგილების შეზღუდვის გამო, პრობლემას წარმოადგენს სასუქების ტრანსპორტირება.

„სასუქზეა ცუდი წვდომა. შხამ-ქიმიკატების ტრანსპორტირება თბლისიდან რეგიონებამდე ცოტა რთულად ხდება, ლოჯისტიკის პრობლემაა. მინდოდა რაღაც გამოეგზავნათ თბილისიდან, მაგრამ ვერ მიგზავნიან, იმიტომ, რომ მანქანა არ მოდის, ან ვერ მოდის და ა.შ. არადა, შხამ-ქიმიკატები თესვის დროს აუცილებელია. ვიყენებთ მცენარეთა დაცვის საშულებებსა და სასუქებს, როგორც მარტივს, ასევე კომპლექსურს. მუშაობენ გარკვეული მაღაზიები, მაგრამ ეს არ არის საკმარისი“, - ამბობს „ახალქალაქის ბიზნეს-ცენტრის“ წარმომადგენელი, ფერმერი მახარე მაცუკატოვი.

საგაზაფხულო სამუშაოებისას არსებულ გამოწვევებზე საუბრობენ სოფლის მეურნეობის სამინისტროს სამცხე–ჯავახეთის რეგიონული სამმართველოშიც.
მათი თქმით, ამ ეტაპზე ფერმერებს ყველაზე დიდი პრობლემა სათესლე მასალის გაძვირებამ შეუქმნა. გარდა ამისა, რეგიონში დეფიციტური გახდა შხამ-ქიმიკატები და მოიმატა ტექნიკის მომსახურების ფასმაც: „საგაზაფხულო სამუშაოები დაწყებულია, პრობლემას ისევ წარმოადგენს ტექნიკის ნაკლებობა. ზოგიერთ მუნიციპალიტეტში, მაგალითად, ბორჯომში მცირე მიწებია იქ და ისეთი ტრაქტორები, რომლებიც შევლენ და დაამუშვებენ, ნაკლებია. რეგიონში ფერმერები აღარ უჩივიან საწვავის სიძვირეს, მაგრამ ტრაქტორების მომსახურება საკმაოდ ძვირია მათთვის და სასუქების ნაკლებობაა. სათესლე მასალაც გაძვირდა“, - ამბობს სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსის მოადგილე, მამუკა თამარაძე.

მისივე თქმით, წინასწარი გათვლებით, მიმდინარე წელს უფრო მეტი მიწა დამუშვდება, ვიდრე გასულ წლებში: „გაიზარდა ფართობების რაოდენობა, უფრო ბევრი იხვნება და ითესება. ჯავახეთის ზონაში, ვინც რუსეთში ვეღარ გავიდა, აქ დაიწყო მიწის დამუშავება. სავარაუდოდ, გაიზრდება მარცვლეული კულტურების ნათესები. შესაძლებელია ბოსტნეულს გაუჩნდეს პრობლემა, რომ სათესლე მასალა არის გაძვირებული“, - ვარაუდობს თამარაძე და ამატებს, რომ ახალციხის მუნიციპალიტეტში კარტოფილის თესვა აქტიურად მიმდინარეობს, ადიგენსა და ასპინძაში კი ორ კვირიანმა უამინდობამ იმოქმედა და სამუშაოები ახლა იწყება.

გასულ წელთან შედარებით, წელს უფრო მეტ ფართობზე დათესა კარტოფილი ახალციხეში მცხოვრებმა ზურაბ სადათიერაშვილმაც. ფერმერი ამბობს, რომ ეს მარაგების სიმცირის შიშს არ უკავშირდება: „მე ოთხ ჰექტარ-ნახევარზე დავთესე კარტოფილი, მაგრამ არა იმიტომ, რომ მარაგები არ ეყოფა. თუ სარწყავის პრობლემა არაა, ჩვენთან შეძლება დათესვა აპრილის დასაწყისიდან, მაისის ბოლომდე. ხახვის დასათესად უკვე ბოლო ვადებია, შემდეგ უნდა დაითესოს სტაფილო, ჭარხალი, ორ კვირაში კი სიმინდის აგროვადა დაიწყება“, - ამბობს ფერმერი.

სამცხე-ჯაავხეთის გუბერნატორი „სამხრეთის კარიბჭესთან“ ამბობს, რომ საგანგებო მდგომარეობიდან გამომდინარე ფერმერებს მიწის დამუშვება არ ეზღუდებათ, თუმცა აუცილებელია დაიცვან რეკომენდაციები. უფრო მეტიც, პრობლემების შემთხვევაში ადმინისტრაცია შეეცდება ფერმერებს დაეხმაროს.

„მნიშვნელოვანია, რომ მაქსიმალურად ბევრი ტერიტორია იყოს ათვისებული და დამუშვებული, იმიტომ, რომ ძალიან რთული ეკონომიკური მდგომარეობაა. გაჩერებულია ძალიან ბევრი საწარმო, ბევრი ბიზნესი და ჩვენ ვფიქრობთ, რომ მარაგების შექმნა არის უმნიშვნელოვანესი. არსებობს საგანგებო მდგომარეობა, გადაადგილებაზე არის შეზღუდვები, მაგრამ ნებისმიერი პრობლემა, რომელიც ამ ადამიანებს წარმოეშვებათ, ჩვენ მზად ვართ რომ დავეხმაროთ“, - აცხადებს ბესიკ ამირანაშვილი.

საგაზაფხულო სამუშაოებსა და ფერმერთა ხელშეწყობაზე ისაუბრა სოფლის მეურნეობის მინისტრმაც. ლევან დავითაშვილის თქმით, რეგიონებში სასოფლო ტექნიკის ნაკლებობა უკვე წლებია პრობლემაა.

„საქართველოში ზოგადად სასოფლო-სამეურნეო ტექნიკის ნაკლებობაა, ეს არის გამოწვევა, რომელიც ჩვენ ათწლეულების განმავლობაში დაგვიგროვდა. ყველა ის ღონისძიება, რომელიც ჩვენ განვახორციელეთ იყო მიმართული იქითკენ, რომ სოფლად მეტი მექანიზაცია გაჩნდეს და ჩვენი ფერმერები ყოფილიყვნენ მეტად კონკურენტუნარიანები და ჰქონოდათ მეტი პროდუქციის უფრო ეფექტურად წარმოების საშულება. ეს ამოცანა ჯერ-ჯერობით მიღწეული არის, ამას დრო დასჭირდება. ბოლო რამდენიმე წელიწადში სიტუაცია უმჯობესდება“, - განაცხადა მინისტრმა.


ფოტო:არქივი

[თაკო ფეიქრიშვილი, ახალციხე]