რა პრობლემები აქვთ ფერმერებს ‘მცირემიწიან ფერმერთა დახმარების პროგრამის’ ფარგლებში

სამცხე–ჯავახეთში „მცირემიწიან ფერმერთა 2015 წლის საგაზაფხულო სამუშაოების ხელშეწყობის პროექტის“ მიმდინარეობას შპს „მექანიზატორის“ გენერალური დირექტორი ზვიად ჩხაიძე, მისი მოადგილე ალექსანდრე ნასარიძე და სოფლის მეურნეობის პროექტების მართვის სააგენტოს „მცირემიწიან ფერმერთა 2015 საგაზაფხულო სამუშაოების პროექტის“ მენეჯერი დავით კიკნაძე გაეცნენ. მათ ინფორმაცია რეგიონის გუბერნატორისგან და მუნიციპალიტეტების გამგებლებისგან მიიღეს.

შეხვედრა დღეს, 26 მარტს, სამხარეო ადმინისტრაციის შენობაში გაიმართა, სადაც პროექტის მიმდინარეობის პროცესში არსებულ პრობლემებზეც ისაუბრეს.

„ჩვენს მეზობლად არის ორი რაიონი, რომელიც სასოფლო–სამეურნეო საქმიანობას ეწევა და სანამ ისინი მორჩებიან ხვნას, ჩვენთან გვიანდება სამუშაოები. აქედან გამომდინარე, ვაწყდებით უამრავ პრობლემას. ტექნიკური მხარეც პრობლემაა, მაგრამ დღეს შეგვპირდნენ, რომ ჩვენი რეალიეფის შესაბამის ტექნიკას შემოიყვანენ“, – ამბობს ასპინძის მუნიციპალიტეტის გამგებელი ლევან ცაბაძე.

მისივე თქმით, მოსახლეობის უმეტესობა ხვნის ბარათებს უკან აბრუნებს, რადგან მიწები შემოდგომაზე დაამუშავეს: „ამ ეტაპზე ხვნის ბარათების დაახლოებით 65% უკან დაბრუნდა. იმიტომ, რომ ხვნის სამუშაოები შესრულებული იყო. შეუძლიათ შემოდგომითაც გამოიყენონ, მაგრამ იყენებენ სასუქის შესაძენად და ურჩევნიათ მოსავალს მოახმარონ“.

შპს „მექანიზატორის“ გენერალური დირექტორი ზვიად ჩხაიძე განმარტავს, რომ საგაზაფხულო სამუშაოები ცოცხალი პროცესია და ამ პროცესში შესაძლოა ტექნიკას გარკვეული პრობლემები შეექმნას. თუმცა, მექანიზაციის სერვის–ცენტრები სწორედ იმიტომ მუშაობენ, რომ ეს პრობლემები მოგვარდეს: „წელს ვვარაუდობთ, რომ ის პრობლემები, რომლებიც შარშან და შარშანწინ იყო აღარ იქნება. გვინდა მოსახლეობა მზად იყოს როცა ჩვენი ტექნიკა შედის, რომ ამ პროცესმა რაიმე შეფერხება არ გამოიწვიოს. ასევე, ნუ დააბრუნებენ ბარათებს, რადგან აღნიშნული პროგრამა საშემოდგომო პერიოდშიც გაგრძელდება“.

ზვიად ჩხაიძის თქმით, ტექნიკა, არა მხოლოდ ამ რეგიონში, არამედ მთელ საქართველოში იმ რაოდენობის არ არის, რა რაოდენობისაც მიზანშეწონილია, რომ იყოს. თუმცა, მექანიზატორის დირქტორი მუნიციპალიტეტების პირველ პირებს დაპირდა, რომ საშემოდგომო სამუშაოების დროს პრობლემა არ შეიქმნება და ტექნიკას სხვა რეგიონებიდანაც შემოიყვანენ.

„მცირემიწიან ფერმერთა 2015 წლის საგაზაფხულო სამუშაოების ხელშეწყობის პროექტის“ ფარგლებში სამცხე–ჯავახეთში 37 ათასი ბენეფიციარია. ამ დროისთვის 778 ჰექტარი მიწაა დახნული. შპს „მექანიზატორში“ ვარაუდობენ, რომ წელს სულ 1746 ჰექტარი მოიხვნება.

[თამარ თოთაძე, ახალციხე]