‘სამი მძიმე პაციენტიდან, ერთის მდგომარეობა კრიტიკულია’ - რატიანი

პირველ საუნივერსიტეტო კლინიკაში 57 ინფიცირებულია. რვა პაციენტი რეანიმაციაშია, მათგან სამი ფილტვის ხელოვნურ ვენტილაციაზე, დანარჩენი 5 კი, სპონტანურ სუნთქვაზეა.

„სამიდან ერთ-ერთის მდგომარეობა კრიტიკულია. დანარჩენ ორ პაციენტთან კი მეტ-ნაკლებად შენარჩუნებულია ვიტალური პარამეტრები. კრიტიკულ პაციენტთან კლინიკურად სახეზეა მწვავე ფილტვის დაზიანების სინდრომი, მწვავე გულის დაზიანების სინდრომი, მწვავე თირკმლის დაზიანების სინდრომი, ღვიძლის დაზიანების სინდრომი, რაც მიუთითებს, რომ არის მულტიორგანული უკმარისობა, ტარდება რეანიმაციული ღონისძებები, ვნახოთ რა შედეგს მივიღებთ“, - აცხადებს რატიანი.

მისივე თქმით, კლინიკაში მყოფი ორი ორსულისა და მათი ნაყოფების მდგომარეობა სტაბილურია.

„ერთ ქალთან გუშინ გავიდა 14 დღე და მოვიდა უარყოფითი პასუხი, დღეს განმეორებით გაიგზავნება ტესტი და თუ დღის ბოლომდე მოვიდა ისევ უარყოფითი, გაეწერება. 24-ე კვირაშია ქალბატონი“.

რაც შეეხება სამ მოზარდს, მათი მდგომარეობა ამ ეტაპზე სტაბილურია, კლინიკური გამოვლინებების მხრივ.

კლინიკაში 37 პაციენტს მწვავე პნევმონია აქვს.

42 წლის მამაკაცის მდგომარეობა, რომელიც მძიმე იყო, დასტაბილურდა. „ჟანგბადის კონცენტრაცია მის ორგანიზმში სტაბილურია“.

11 აპრილის 12:00 საათის მდგომარეობით, stopcov.ge- ზე მონაცემები ასე გამოიყურება:

• კორონავირუსის დადასტურებული შემთხვევა - 233
• მათ შორის გამოჯანმრთელებული - 54
• მათ შორის გარდაცვლილი- 3
• კარანტინის რეჟიმში - 4672
• სტაციონარში მეთვალყურეობის ქვეშ - 373
• *უცხოეთიდან სამკურნალოდ გადმოყვანილი საქართველოს მოქალაქეები- 3

[თაკო ფეიქრიშვილი, ახალციხე]