აკაკი ზოიძე – მარნეულში ინფიცირებულ ქალთან 1700-მდე კონტაქტი იკვეთება

აღნიშნული შესახებ აკაკი ზოიძემ პრემიერ-მინისტრთან შეხვედრის დასრულების შემდეგ ჟურნალისტებთან ისაუბრა.

“ბოლნისის შემთხვევაზე საკმაოდ პრობლემატური არის ის საკითხი, რომ ძალიან ბევრი კონტაქტი იკვეთება. დაახლოებით არის 1700-მდე უკვე იმ 90 კონტაქტიდან შემდგომი ტალღის სახით და ყველას გამოკვლევა და შემდგომში იზოლაცია საჭირო”, - განაცხადა ზოიძემ.

მისი თქმით, მხოლოდ ტესტირებას აზრი არ აქვს, თუ არ იქნება სხვა ზომებიც მიღებული.

"ყველაზე უარეს შემთხვევაში, შეიძლება არსებობდეს 540 ინფიცირებული, 10 ჯერ მეტი შემთხვევა, რომელებსაც სიმპტომები გამოვლენილი არ აქვთ. ნაწილი მათგანი იზოლაციაში, ნაწილი კი კარანტინშია. სიმპტომები გამოვლენილი ჯერ არ აქვს. 540 ადამიანის დაჭერა სწრაფი ტესტირების სამ მილიონ ექვსასი ათას ადამიანში არის ნონსენსი”, – განაცხადა კაკი ზოიძემ.

მარნეულში 62 წლის ქალს, კორონავირუსი გუშინ, 22 მარტს დაუდგინდა. ინფიცირებული პირველ საუნივერსიტეტო კლინიკაში მკურნალობს. მისი ჯანმრთელობის მდგომარეობა კრიტიკულია და მართვით სუნთქვაზე იმყოფება.

ინფცირების გამოვლენამდე პაციენტი მარნეულში, „ჯეო ჰოსპიტალსის“ კლინიკაში მკურნალობდა. გიორგი გახარიას განცხადებით, მისი ინფიცირების წყარო გამოვლენილი არ არის, რის გამოც, ქვეყანა შიდა გავრცელების ეტაპზე გადავიდა, პრევენციის მიზნით, მარნეულის და ბოლნისის მუნიციპალიტეტები ჩაიკეტა.

მუნიციპალიტეტებში შესვლას და გამოსვლას პოლიცია და ჯარი აკონტროლებს. მარნეულში მოეწყო საველე ჰოსპიტალიც.

[sknews.ge]