მარნეულში მცხოვრები COVID 19-ით ინფიცირებული 62 წლის ქალი გამოჯანმრთელდა

„პირველი კრიტიკული პაციენტის, 62 წლის ქალის მდგომარეობა კლინიკაში შემოყვანისას იყო ტერმინალური, ეს ქალი რამდენიმე საათში გაეწერა კლინიკიდან. აქვე გვყავს კიდევ ერთი გამოჯანმთლებეული 65 წლის ქალი. რეანიმაციაში გვყავს ხუთი პაციენტი, აქედან მძიმე იყო 42 წლის ახალგარზდა, რომელსაც ჰქონდა კოვიდ ინფექცია ქრონიკული პათოლოგიების გარეშე, მწვავე ფილტვის დაზიანების სურათი. ბოლო 48 საათის განმავლობაში, მისი მდგომარეობა მკვეთრად გაუმჯობესდა და ის გადადის თერაპიულ განყოფილებაში“, - აცხადებს რატიანი.

მისივე თქმით, კლინიკაში ოთხი პაციენტი ფილტვის ხელოვნურ ვენტილაციაზეა: „მე გუშინ ვაცხადებდი, რომ ერთის მდგომარება იყო ტერმინალური, ამ ეტაპზე კი მის მდგომარეობა სტაბილურია. დანარჩენი სამი პაციენტი, რომლებიც ხელოვნურ სუნთქვაზე იმყოფებიან, მძიმეა, მაგრამ ამ ეტაპზე სტაბილური“.

რატიანი ამბობს, რომ დასტაბილურდა ცხრა კვირის ორსულისა და მისი ნაყოფის ასევე სამი მოზარდის მდგომარეობა.

„მედ-პერსონალი, რომლებიც გადმოყვანილი არიან სხვა კლინიკიდან, მათი მდგომარეობაც მკვეთრად გაუმჯობესებულია. ამ ეტაპზე, კლინიკაში გვყავს 85 პაციენტი, აქედან ინფიცირებულია 67-ია“, - ამბობს ლევან რატიანი.

მარნეულში 62 წლის ქალს, კორონავირუსი 22 მარტს დაუდგინდა. იმის გამო, რომ ვერ დადგინდა მისი ინფიცირების წყარო, პრემიერ–მინისტრმა გიორგი გახარიამ, მარნეულსა და ბოლნისში მკაცრი კარანტინი გამოაცხადა. მუნიციპალიტეტები ჩაიკეტა, მთავრობის მეთაურმა კი განაცხადა, რომ ქვეყანა შიდა გავრცელების ეტაპზე გადავიდა.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა, დღემდე ქვეყანაში ინფიცირების 296 შემთხვევა გამოვლინდა, გარდაიცვალა სამი, გამოჯანმრთელდა 69 პაციენტი.

[თაკო ფეიქრიშვილი, ახალციხე]