რას გულისხობს მკაცრი საკარანტინო რეჟიმი – გახარიას განმარტება

მარნეულში მცხოვრები პაციენტის COVID-19-ით ინფიცირების წყაროს დადგენა ვერ ხერხდება, ამის გამო ქვეყანა გადავიდა კორონავირუსის შიდა გავრცელების ეტაპზე.

პრემიერ–მინისტრის, გიორგი გახარიას განცხადებით, რადგან შიდა გადაცემა მოხდა სარიტუალო ღონისძიების დროს, მთავრობამ მიიღო გადაწყვეტილება, რომ ქვეყნის ორ მუნიციპალიტეტში მკაცრი საკარანტინო რეჟიმი გამოაცხადოს.

რას გულისხმობს მკაცრი საკარანტინო რეჟიმი:

▪იზღუდება მარნეულის და ბოლნისის მუნიციპალიტეტებში შესვლა და გამოსვლა;

▪იხურება ყველა ობიექტი, ხელმისაწვდომი იქნება მხოლოდ საკვები პროდუქტების, მედიკამენტების და კრიტიკული ინფრასტრუქტურის სხვა ობიექტები;

▪შეიზღუდება საზოგადოებრივი ტრანსპორტის მოძრაობა;

▪მუნიციპალიტეტის შიგნით იზღუდება გადაადილება გარდა, იმ შემთხვევებისა, როცა ადგილობრივები გადაადგილდებიან საკვები პროდუქტების, ან მედიკამენტების შესაძენად, ან სამედიცინო მომსახურების მისაღებად;

▪მუნიციპალტეტების ტერიტორიებზე საზოგადოებრივ წესრიგს დაიცავს და საგანგებო რეჟიმს უზრუნველყოფს შინაგან საქმეთა სამინისტრო;

„ასევე ჩვენ დავუშვით გამონაკლისი, როდესაც გვექნება მედიკოსების მიერ, მკაცრად გაწერილი პროტოკოლი, მარნეულის და ბოლნისის მოქალაქეებს მივცემთ შესაძლებლობას სასოფლო–სამეურნეო სამუშაოების ჩატარების“, – განაცხადა ბრიფინგზე გახარიამ.

მისი თქმით, მარნეულში კარანტინის რეჟიმზეა გადასული კლინიკა „ჯეო ჰოსპიტალსი“. ეს ის კლინიკაა, სადაც კორონავირუსით ინფიცირებული ქალი მკურნალობდა.

გახარიას განმატებით, კლინიკის ტერიტორიაზე უახლოეს მომავალში განთავსდება საველე ჰოსპიტალი, ხოლო მარნეულში მდებარე მეორე კლინიკა გააგრძელებს მუშაობას, როგორც მულტიფუნქციონალური სამედიცინო დაწესებულება.

მკაცრი კარანტინის პირობებში ადგილობრივ, მარნეულსა და ბოლნისში განთავსებულ მედიას მუშაობა არ ეზღუდება, სხვა მედიასაშუალებები კი მასალებს საზოგადოებრივი მაუწყებლის სპეცჯგუფებისგან მიიღებენ.

მარნეულში 62 წლის ქალს, კორონავირუსი დღეს დაუდგინდა. იგი ორმხრივი პნევმონიით მარნეულის „ჯეო ჰოსპიტალსის“ კლინიკაში ოთხი დღის წინ მოათავსეს, მისი ჯანმრთელობის მდგომარეობა კრიტიკულია. ის მართვით სუნთქვაზე იმყოფება.ინფიცირებული თბილისში, პირველ საუნივერსიტეტო კლინიკაში მკურნალობს.

22 მარტის მონაცემებით, ქვეყანაში კორონავირუსის 54 დადასტურებული შემთხვევაა, მათ შორის გამოჯანმრთელებულია - 3, კარანტინის რეჟიმში იმყოფება 3 254, სტაციონარში მეთვალყურეობის ქვეშ კი 233.

[sknews.ge]