ლენტეხის მუნიციპალიტეტში სრული კარანტინი ამოქმედდა

ფოტო: საქართველოს მთავრობა
„ეპიდემიოლოგების და მედიკოსების რჩევით, ასევე მიღებული ინფორმაციის საფუძველზე მივიღეთ გადაწყვეტილება, რომ ლენტეხის რაიონში ამოქმედდეს სრული კარანტინი, რაც გულისხმობს იმას, რომ ლენტეხის რაიონში ამოქმედდება ზუსტად ის რეჟიმი, რაც დღესდღეობით არის ბოლნისისა და მარნეულის რაიონებში,“ - განაცხადა ჩიქოვანმა.

მისი თქმით, ლენტეხის შესასვლელს და გამოსასვლელს გააკონტროლებს შინაგან საქმეთა სამინისტრო და თავდაცვის ძალები. დაწყებულია მოქალაქეების თერმოსკრინინგიც.

„ეს გადაწყვეტილება განპირობებულია იმით, რომ მაქსიმალურად შევზღუდოთ შიდა გავრცელება და შესაბამისად არ მოხდეს ამ კერის უფრო გაფართოება“, - განაცხადა ჩიქოვანმა.

ლენტეხში კორონავირუსით ინფიცირების ხუთი შემთხვევაა გამოვლენილი. პირველი შემთხვევა მუნიციპალიტეტში რვა აპრილს დაფიქსირდა, ვირუსი 53 წლის კაცს დაუდგინდა, რომელიც ცაგერისა და ლენტეხის მუნიციპალიტეტებში გადაადგილდებოდა. დღეს კი ლენტეხის მუნიციპალიტეტში ოთხი შემთხვევა დაფიქსირდა, მათ შორის ერთი არასრულწლოვანია.

23 მარტიდან მკაცრი საკარანტინო რეჟიმი მოქმედებს მარნეულსა და ბოლნისშიც. პრემიერ–მინისტრის, გიორგი გახარიას განცხადებით, ვერ დადგინდა მარნეულში მცხოვრები 62 წლის ქალის დაინიფირების წყარო, ამიტომ გახდა მკაცრი ზომების მიღება საჭირო.

[sknews.ge]