„სამართლიან არჩევნებს“ სამცხე-ჯავახეთში დარღვევა არ დაუფიქსირებია

"სამართლიანი არჩევნების“ ინფორმაციით, 2012 წლის საპარლამენტო არჩევნებთან შედარებით საარჩევნო უბნების გახსნის პროცესი გაუმჯობესებულია. ორგანიზაციის ყველა დამკვირვებელს (100%) მიეცა უბანზე შესვლისა და დაკვირვების განხორციელების საშუალება.

"ეს პროგრესია წინა არჩევნებთან მიმართებაში, როცა უბანზე დაუშვეს "სამართლიანი არჩევნების’’ დამკვირვებლების 98%. პირველი ამომრჩევლის მისაღებად 8 საათისთვის მზად იყო საარჩევნო უბნების 96%, ხოლო 2012 წელს - უბნების 91%. ამასთან, რადგან წარსულში არსებობდა კითხვები გადასატანი საარჩევნო ყუთით ხმის მიცემასთან დაკავშირებით, "სამართლიანი არჩევნები’’ მიესალმება იმ ფაქტს, რომ გადასატანი საარჩევნო ყუთის სიაში ამომრჩეველთა საშუალო რაოდენობა შეადგენს 16 ადამიანს. 2012 წელს აღნიშნული მონაცემი იყო 21 ამომრჩეველი. ჩვენი დაკვირვებით, გადასატანი საარჩევნო ყუთის სიაში დარეგისტრირებული ამომრჩევლების მაქსიმალური რაოდენობა არის დაახლოებით 200 ადამიანი, რაც წინა წელთან შედარებით მნიშვნელოვნად შემცირებულია (300 ადამიანი)", - აცხადებენ ორგანიზაციაში.

ამ დროისთვის „სამართლიანმა არჩევენებმა“ დააფიქსირა:

არაუფლებამოსილი პირების საარჩევნო უბანზე ყოფნის 3 ფაქტი #23 (დედოფლისწყარო), #11 და #36 ( კასპი);
მასალების არასათანადოდ წარმოების 2 შემთხვევა #6 (ბათუმი) , #76 (საბურთალო) საარჩევნო უბნებზე;
საარჩევნო უბნის გახნის პროცედურული დარღვევების 2 შემთხვევა #72 (რუსთავი), #24 (გორი) საარჩევნო უბნებზე;
საკონტროლო ფურცლის არასათანადო შევსების 2 ფაქტი #65 (ქუთაისი) და #5 (ისანი) საარჩევნო უბნებზე.

ორგანიზაციის დამკვირვებლებმა საარჩევნო კომისიებში ამ დროისთვის 6 საჩივარი შეიტანეს.

ორგანიზაციის 1200 დამკვირვებელი საპრეზიდენტო არჩევნებს საქართველოს მთელს ტერიტორიაზე აკვირდება.

[sknews.ge]