'სამართლიანი არჩევნების' 17:00 საათის მონაცემები

'სამართლიანი არჩევნების' ხმების პარალელური დათვლის შედეგების თანახმად, 17:00 საათზე ამომრჩევლის აქტივობა იყო 38.2% (+/-1.1% ცდომილების ხარისხით). ეს უფრო დაბალი მაჩვენებელია, ვიდრე 2012 წლის საპარლამენტო არჩევნებზე 17:00 საათისთვის დაფიქსირებული აქტივობა, რომელიც 52.1 პროცენტს შეადგენდა, - ამბობენ ორგანიზაციაში.

„სამართლიანი არჩევნების“ დაკვირვებით, მიმდინარე საანგარიშო პერიოდშიც დაფიქსირდა არასთანადო დოკუმენტაციით ხმის მიცემის, მარკირების პროცედურის დარღვევისა და უბანზე არაუფლებამოსილი პირების ყოფნის ფაქტები.

კერძოდ:

• აგიტაცია #43 (დმანისი) საარჩევნო უბანზე - საარჩევნო კაბინაში შემოხაზული იყო ნომერი 5;
• არაუფლებამოსილი პირების საარჩევნო უბანზე ყოფნის 4 შემთხვევა - #4, #2, #19 (ახალციხე) და #33 (მარტვილი);
• არასათანადო დოკუმენტაციით ხმის მიცემის 3 შემთხვევა #28 (სიღნაღი),#22 (დუშეთი) და #120 (ქუთაისი) საარჩევნო უბნებზე;
• საარჩევნო დოკუმენტაციის არასათანადოდ წარმოება/შევსების 2 ფაქტი - #27(კასპი) უბანზე არ ივსებოდა სადემონსტრაციო ოქმი, თუმცა დამკვირვებლის მითითების შემდეგ დარღვევა აღმოიფხვრა; #43 (დმანისი) საარჩევნო უბანზე ბლოკნოტიდან ბიულეტენის ამოხევის დროს, ბლოკნოტში არ დარჩენილა ბიულეტენის ის ნაწილი, რაზეც მითითებულია ბიულეტენის ნომერი. ასეთი სახით გაიცა სამასამდე ბიულეტენი;
• ხმის მიცემის ფარულობის დარღვევა #22 (ჩოხატაური) საარჩევნო უბანზე - კომისიის წევრმა კაბინის გარეთ მისცა ხმა;
• მარკირების არ შემოწმების 4 შემთხვევა #20(კასპი) საარჩევნო უბანზე;
• მარკირება არ გაკეთდა #37 (მარნეული) საარჩევნო უბანზე;
• #33 (საბურთალო) საარჩევნო უბანზე ამომრჩეველს ხელი დახვდა მოწერილი ამომრჩეველთა ერთიან სიაში და ვერ შეძლო კენჭისყრაში მონაწილეობის მიღება;
• #14 (ვანი) საარჩევნო უბანზე ამომრჩეველმა ხმა მისცა ერთიანი სიით და გადასატანი ყუთით;
• #23 (მცხეთა) საარჩევნო უბანზე ძირითადი ყუთი უბნის გახსნიდან 14:30 საათამდე იყო დაულუქავ მდგომარეობაში, ხოლო 14:30 საათზე დაილუქა.

“სამართლიანი არჩევნების“ შემდეგი განცხადება გამოქვეყნდება 22:30 საათზე.

[sknews.ge]