'იგი დროსა და სივრცეშია დაკარგული' – კახი კალაძე მერაბიშვილის გათავისუფლებას ეხმაურება

„მერაბიშვილის განცხადებებიდან გამომდინარე აშკარაა, რომ იგი დროსა და სივრცეში არის დაკარგული. ვაცადოთ, ჩაეხუტოს ოჯახს, გაერკვეს, თუ რა რეალობაა, რა ხდება და შემდეგ მოვუსმინოთ", - განაცხადა კახა კალაძემ.

ვანო მერაბიშვილის განცხადებასთან დაკავშირებით ჟურნალისტებთან კომენტარი გააკეთა გიორგი გახარიამაც. მისი თქმით, დამხობის მცდელობები აქამდეც ჰქონდათ, მაგრამ არაფერი გამოუვიდათ. „ნაციონალური მოძრაობა" წარსულია და მათ მომავალზე უნდა იფიქრონ: "არც აწი გამოუვათ, ჩვენ უნდა ვაკეთოთ და ვიშრომოთ იმისთვის, რომ ეს ქვეყანა იყოს გამოწვევების და დამხობის კი არა, შესაძლებლობების ქვეყანა ახალგაზრდებისთვის".

შინაგან საქმეთა ყოფილმა მინისტრმა, ვანო მერაბიშვილმა თითქმის შვიდწლიანიი პატიმრობის შემდეგ, პენიტენციური დაწესებულება, ე.წ. მატროსოვის ციხე დღეს, 20 თებერვალს დატოვა.

ციხიდან გამოსვლის შემდეგ მერაბიშვილმა პოლიტიური განცხადება გააკეთა, მისი თქმით, "ერთ წელიწადში ეს ხელისუფლება დასრულდება".

შს ყოფილი მინისტრი 2013 წლის მაისში მითვისება-გაფლანგვისა და ამომრჩევლის მოსყიდვის ბრალდებით დააკავეს. მოგვიანებით, მას სხვა ბრალდებებიც წაუყენეს — 2011 წლის 26 მაისის აქციისა და სანდრო გირგვლიანის მკვლელობის საქმეებზე უფლებამოსილების გადამეტების მუხლებით. მერაბიშვილი 2014 წელს სასამართლომ დამნაშავედ სცნო და პატიმრობა მიუსაჯა.

ამჟამად საქალაქო სასამართლოში მერაბიშვილს შვიდი ნოემბრის აქციის დარბევისა და იმედში შეჭრის საქმეზე უფლებამოსილების გადამეტებას ედავებიან. მისი ადვოკატის, ოთარ კახიძის განმარტებით, ამ საქმეზე გამტყუნების შემთხვევაშიც კი, უკვე მოხდილი წლები ამეტებს ახალ შესაძლო სასჯელს და მერაბიშვილს ამის გამო ვერ დაიჭერენ.

[sknews.ge]