ვანო მერაბიშვილი: გაძლევთ გარანტიას, რომ ერთ წელიწადში ეს ხელისუფლება დასრულდება

ფოტო: on.ge

"ბატონებო, ზუსტად ექვსი წელიწადი და ცხრა თვე ვიმყოფებოდი ამ საპატიმროში სამარტოო საკანში. მე ვარ კმაყოფილი, იმით რომ არ წავედი არავითარ კომპრომისზე, უპირველეს ყოვლისა არ წავედი კომპრომისზე ჩემი საკუთარი თავის მიმართ. მადლობას ვუხდი ყველა გულშემატკივარს, ახლობელს. მათი მხარდაჭერით და მომავლის იმედით მე შევინარჩუნე ძალა, ენერგია, იმედი, რწმენა, რომ გავაგრძელო ბრძოლა იმისათვის, რომ ეს რეჟიმი საქართველოს წელსვე ჩამოცილდეს. მე გაძლევთ გარანტიას, რომ ერთ წელიწადში ეს ხელისუფლება დასრულდება. ეს არის აუცილებელი იმსათვის, რომ ქვეყანაში დაიწყოს განვითარება, ჩვენი ხალხის კეთილდღეობა გაიზარდოს, გაქრეს უიმედობა, ახალგაზრდობას მიეცეს პერსპექტივა, ადამიანებს დასაქმება და ღირსეული ხელფასი, მოხუცებს კი ღირსეული პენსია", - განაცხადა სასჯელაღსრულების დაწესებულების დატოვების შემდეგ შს ყოფილმა მინისტრმა, ყოფილმა პრემიერმა ვანო მერაბიშვილმა.

მერაბიშვილი ამბობს, რომ ყველა ვინც სასჯელაღსრულების მეცხრე დაწესებულებაში ზის არის პოლიტპატიმარი: "ჩვენ აუცილებლად გავიმარჯვებთ, მე გაძლევთ გარანტიას, რომ ამ ხელისუფლების დამხობის შემდეგ, ამ ციხის კარები ფართოდ გაიღება".

რომელ პარტიასთან ითანამშრომლებს მერაბიშვილი, ამ საკითხზე კომენტარს მოგვიანებით გააკეთებს.

"ძალიან მახარებს, რომ მთელი ოპოზიცია საქართველოში არის ერთიანი და ჩვენ ერთად შევძლებთ ამ რეჟიმის დამარცხებას. თქვენ იცით, რომ აქამდე კონკრეტულ პარტიასთან დაკავშირებით მე განცხადებას არ ვაკეთებდი, იმიტომ მე ვიყავი იზოლაციაში, ვიყავი ჩამოცილებული ყოველდღიურ პროცესებს, ხუთ წუთში, რაც მე გამოვედი საკნიდან არაფერი შეცვლილა. ჩემი უახლოესი მეგობრები, ჩემდა სამწუხაროდ დღეს სხვადასხვა პარტიაში არიან, მე ყველა მათგანს შევხვდები სათითაოდ და გაძლევთ გარანტიას, რომ როცა ჩამოვყალიბდები გაცნობებთ. ჩემს წინააღმდეგ შეუძლიათ კიდევ 10-მდე საქმე აღძრან, მე ეს ვერ გამტეხავს. მე გითხარით, რომ ვაპირებ აქტიურ პოლიტიკაში ჩართვას, ამ რეჟიმის დასამარცხებლად" - განაცხადა ვანო მერაბიშვილმა.

[sknews.ge]