ვანო მერაბიშვილის დასახვედრად სამცხე-ჯავახეთიდან ოპოზიციური პარტიის წარმომადგენლები მიდიან

„ევროპული საქართველოს“ ახალციხის რაიონული შტაბის ხელმძღვანელის გელა დემეტრაძის თქმით, შტაბის წევრები ხვალ დილით ადრე გავლენ, რათა ვანოს ციხიდან გამოსვლის დროს შეხვდნენ.

„60 ადამიანზე მეტი ვიქნებით. დილით ექვს საათზე გავალთ სავარუდოდ. იქ ვიქნებით ვანოს მეგობრები და ის ადამიანები ვინც მას სოლიდარობას უცხადებენ. მერაბიშვილის პატიმრობა პოლიტიკური მიზნებისთის გამოიყენეს. თითქმის ყველა სასამართლო პროცესს ვესწრებოდი. ვუსმენდი როგორც ბრალდების მხარეს ისე დაცვის მხარეს მათ არგუმენტებს და დღესაც ხმამაღლა ვამბობ რომ ვანო პოლიტპატიმარია. ბრალდების მხარის მოწმეები ხან რას ამბობდნენ ხან რას, ეტყობოდათ, რომ პროკურატურაში იყვნენ დარიგებულები“,- ამბობს გელა დემეტრაძე.

ვანოს დასახვედრად ადიგენის „ნაციონალური მოძრაობის“ შტაბის ხელმძღვანელი დავით ოგანეზიანი უკვე წავიდა.

ხვალ თბილისში პოლიტიკური პარტიების წარმომადგენლები ჯავახეთიდანაც მიდიან.

„ვანო მერაბიშვილი პირველივე დღიდან პოლიტპატიმარია. დრო მოვა და აღიარებენ, რომ პოლიტპატიმარია, ამის ფაქტებიც არის და სტრასბურგის სასამართლოს განაჩენიც. ძალიან ბევრმა გამოთქვა სურვილი და ყველა წავალთ მის შესახვედრად“,-ამბობს ჯავახეთში „ევროპული საქართველოს“ წარმომადგენელი არსენ კარაპეტიანი.

ყოფილ შს მინისტრს პატიმრობის ვადა, ხვალ 20 თებერვალს ეწურება. მისი ადვოკატის თქმით, ვანო პოლიტიკაში დაბრუნებას გეგმავს.

მერაბიშვილი 2013 წლის მაისში დააკავეს მითვისება-გაფლანგვისა და ამომრჩევლის მოსყიდვის ბრალდებით. მოგვიანებით, მას სხვა ბრალდებებიც წაუყენეს — 2011 წლის 26 მაისის აქციისა და სანდრო გირგვლიანის მკვლელობის საქმეებზე უფლებამოსილების გადამეტების მუხლებით. მერაბიშვილი 2014 წელს სასამართლომ დამნაშავედ სცნო და პატიმრობა მიუსაჯა.

[მარიამ ბარძიმაძე, ახალციხე]