ვანო მერაბიშვილი საპატიმროს ექვს თვეში დატოვებს

დაბრუნდება თუ არა „ნაციონალურ მოძრაობაში“ ან შეუერთდება თუ არა სხვა პოლიტიკურ პარტიას, ვანო მერაბიშვილის ადვოკატი გიორგი ჩივიაშვილი „სამხრეთის კარიბჭესთან“ აცხადებს რომ არ იცის.

„არ ვიცი კონკრეტულად რა გეგმები აქვს, თუმცა საპატიმროს დატოვების შემდეგ პოლიტიკურ პროცესში ჩაერთვება“,–ამბობს გიორგი ჩივიაშვილი.
მერაბიშვილთან შესაძლო თანამშრომლობის შესახებ კომენტარი „თიბისი“ ბანკის დამფუძნებელმა მამუკა ხაზარაძემაც გააკეთა. თუმცა მისივე თქმით, საკითხზე მერაბიშვილთან კონსულტაციები არ ჰქონია.

ვანო მერაბიშვილი 2013 წლის მაისში დააკავეს. შინაგან საქმეთა ყოფილი მინისტრი სასჯელს რამდენიმე საქმეზე იხდის, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე.

ვანო მერაბიშვილის წინააღმდეგ სასამართლო პროცესები ახლაც, შვიდი ნოემბრის აქციის დარბევისა და „ტელეიმედში“ შეჭრის საქმეზე მიმდინარეობს, თუმცა რა განაჩენიც არუნდა დადგეს, გიორგი ჩივიაშვილის თქმით, მას უკვე სასჯელის მოხდაში ჩაეთვლება და ის პატიმრობიდან, ისევ 2020 წლის თებერვალში გათავისუფლდება.

[ლუბა გიორგაძე, ახალციხე]