ახალციხეში სპეცუბნები აღარ გაიხსნება

2012 წლის საპრეზიდენტო არჩევნებზე ახალციხის ოლქში ორი სპეცუბანი გაიხსნა, ახალციხის სასაზღვრო ჯარსა და ახალციხის სატანკო ნაწილში.

სასაზღვრო ჯარში სპეცუბნის გახსნის მოთხოვნით შინაგან საქმეთა სამინისტრომ #37 ახალციხის საოლქო საარჩევნო კომისიას წერილობით წელსაც მიმართა, თუმცა საოლქო საარჩევნო კომისიამ შინაგან საქმეთა სამინისტროს მოთხოვნა არ დააკმაყოფილა.

„შინაგან საქმეთა სამინისტრომ მოგვმართა ამასთან დაკავშირებით, თუმცა იმ ტერიტორიაზე 42 ამომრჩეველია, საარჩევნო კოდექსის მიხედვით კი, იქ სადაც 50-ზე ნაკლები ამომრჩეველია, საარჩევნო უბანი არ იხსნება“,-ამბობს #37ახალციხის საოლქო საარჩევნო კომისიის თავმჯდომარე თეა გავაშელი.

მისი თქმით, აღნიშნული ამომრჩევლები სხვადასხვა უბნებზე გადანაწილდებიან: „ეს ამომრჩევლები ხმას მიცემენ თავიანთი დისლოკაციის ადგილის მიხედვით. მივამაგრეთ წყალთბილის 22-ე და 24-ე საარჩევნო უბნებზე, ორი კაცი კი ხმას 31-ე საარჩევნო უბანზე მისცემს“.

გავაშელის თქმით, წინა არჩევნებისგან განსხვავებით, ახალციხეში წელს სპეცუბნები აღარ გაიხსნება: „ჩემს ოლქში სპეცუბნები აღარ გაიხსნება და როგორც ვიცი, ეგრეთ წოდებული დახურული უბნები არცერთ ოლქში აღარ იხსნება“.

დახურული უბნები რომ აღარ გაიხსნება, ამის შესახებ გუშინ, 23 ოქტომბერს, საქართველოს შინაგან საქმეთა მინისტრმა ირაკლი ღარიბაშვილმა განაცხადა.

„გახსოვთ ალბათ, რომ წლების განმავლობაში არსებობდა ეგრეთ წოდებული დახურული უბნები, სადაც აბსოლუტურად ნოლი კონტროლი არსებობდა, იქ მონიტორინგის უფლება პრაქტიკულად არავის ჰქონდა. ხდებოდა პოლიციელების, როგორც ასე ვთქვათ, ძალიან შეურაცხმყოფელად მიყვანა, ძალდატანება და მათთვის სასურველი კანდიდატისთვის ხმის მიცემა. ეს ეპოქა წარსულს ჩავაბარეთ“, - განაცხადა ირაკლი ღარიბაშვილმა.

როგორც მან აღნიშნა, მათ ხელოვნურად შექმნილი უბნები გააუქმეს.

„დავტოვეთ მხოლოდ აუცილებელი დახურული უბნები, სადაც პრაქტიკულად შეუძლებელი იქნებოდა ამის გარეშე. მე მხედველობაში მაქვს იგივე საჯარისო, სპეცდანიშნულების რაზმები და წვევამდელების დახურული უბნები. ეს არის უპეცედენტო საარჩევნო გარემო და მე ვფიქრობ, რომ ამით ყველა უნდა ვამაყობდეთ“,-განაცხადა ღარიბაშვილმა.

[მანანა სარაშვილი, ახალციხე]