ახალციხის ოლქში საარჩევნო უბნების მდებარეობა იცვლება

#37 ახალციხის საოლქო საარჩევნო კომისია უკვე საარჩევნო რეჟიმში მუშაობს. მათ საარჩევნო უბნების საზღვრების შესახებ ცესკოს 1 ივლისის მონაცმები უკვე მიაწოდეს.

#37 ახალციხის საოლქო საარჩევნო კომისიის თავმჯდომარის თეა გავაშელის განცხადებით, საზღვრები არ შეცვლილა, რადგან 1500 ამომრჩეველზე მეტი არცერთ საარჩევნო უბანზე არ არის: „შეცვლილი სია ცესკოდან უკვე მივიღეთ. ბოლო არჩევნებზე თუ 36 407 ამომრჩეველი გვყავდა, ახლა 35 098 გვყავს“.

საარჩევნოდ ოლქში მდებარე 10-მდე უბანი მისამართს შეიცვლის. მათ შორის ერთ-ერთი რაბათში #5 საარჩევნო უბანი იქნება. თუ აქამდე აქ საარჩევნო უბანი რიტუალების სახლში იყო, ამჯერად ციხის ტერიტორიაზე, ერთ-ერთ ოთახში განთავსდება.
„რიტუალები კერძო საკუთრებაა, ამიტომ ქირის გადახდა გვიხდებოდა“, - გვიხსნის გავაშელი.

კერძო საკუთრებაში, რესტორან „ტყუპებშია“ განთავსებული #32 საარჩევნო უბანიც.

„სავარაუდოდ, აქ შეცვლას ვერ შევძლებთ, რადგან სხვა ალტერნატიული ფართი, რომელიც სახელმწიფოს ბალანსზე იქნებოდა, ვერ ვნახეთ, - ამბობს გავაშელი და ამატებს, რომ შენობათა ნუსხა საოლქოს ადგილობრივმა თვითმმართველობამ უნდა გადასცეს , - წერილობით უკვე მივმართეთ და დაგვპირდნენ, რომ მაქსიმალურად დაგვეხმარებიან“.

საოლქომ მუნიციპალიტეტის გამგეობას უბნების მდებარეობის შეცვლა იმ 9 სოფელშიც სთხოვა, სადაც საარჩევნო უბნები საკრებულოს შენობებშია განთავსებული: „კოდექსით ეს მისაღები არ არის. ასევე ყველა საკრებულოს შენობა ძალიან პატარაა. ვფიქრობთ, საკრებულოებიდან უბნები სკოლებში გადავიტანოთ. ასე უფრო მოსახერხებელი იქნება, თან სკოლებში ინფრასტრუქტურა უფრო მოწესრიგებულია და დირექტორებიც ამის გამო არასდროს პრობლემას არ გვიქმნიან“.

მისივე თქმით, სასურველია, თუ უბნების მდებარეობა იმ სოფლებშიც შეიცვლება, სადაც საარჩევნო უბნები განთავსებული რიტუალების სახლებშია: „სოფელში რიტუალების სახლი ადგილობრივებს ხშირ შემთხვევაში ქელეხისთვის სჭირდება. გვქონდა შემთხვევა, რომ ცოტახნით უბნის დატოვება მოგვიხდა, რადგან სოფელში მიცვალებული ჰყავდათ“.

[თამუნა უჩიძე, ახალციხე]