საარჩევნო უბნები ბიულეტენებს დღეს მიიღებენ

#37–ე ახალციხის საოლქო საარჩევნო კომისიამ დალუქული ბიულტენები გუშინ, 6 ოქტომბერს მიიღო. ისინი უბნებზე, ამომრჩევლეთა რაოდენობის შესაბამისად, დღეს, 7 ოქტომბერს გადანაწილდება. ბიულეტენების საერთო რაოდენობა 77 350–ია.
მათგან:
31 700 ბიულეტენი მაჟორიტარული;
31 700 ბიულეტენი პროპორციული;
13 950 ბიულეტენი მერის არჩევნებისათვის.

#37–ე ახალციხის საარჩევნო ოლქში შემავალ უბნებზე, ბიულეტენები ამომრჩეველთა რაოდენობის მიხედვით გადანაწილდება.

ახალციხის თემის სოფლებში არსებულ 22 უბანს, ორი სახის ბიულეტენი: მაჟორიტარული და პროპორციული გადაეცემა. ხოლო ქალაქში არსებული 13 საარჩევნო უბნისათვის, სამი სახის ბიულეტენია გათვალისწინებული: მაჟორიტარული, პროპორციული და მერის. გამომდინარე იქიდან, რომ ქალაქის მაცხოვრებლები 8 ოქტომბერს ქალაქის მერსაც აირჩევენ.

8 ოქტომბრის საპარლამენტო და რიგგარეშე არჩევნებისათვის დაბეჭდილი ბიულეტენები ფერსა და ზომაში განსხვავდება.
პროპორციული სიისათვის– ცისფერი;
მაჟორიტარებისათვის – ვარდისფერი;
მერის არჩევნებისათვის – მწვანე.

საარჩევნო ბიულეტენებს დალუქულ მდგომარეობაში ოლქის 35 – ვე უბანი მიიღებს.

"დალუქულ მდგომარეობაში ჩამოვიტანეთ ბიულეტენები. ხვალ, 7 ოქტომბერს ისევ გაიხსნება, ვინაიდან უბნებზე გადაცემა მოხდება ნომრებისა და თვლის შესაბამისად, შემდეგ ისევ დავლუქავთ, დაერტყმება ოლქის ბეჭედი, დაისკოჩება და გავატანთ უბნებს“, – განმარტავს #37–ე ახლციხის საოლქო საარჩევნო კომისიის თავმჯდომარე თეა გავაშელი.

დღესვე, ოლქში შევამავლი უბნები არჩევნებისთვის საჭირო ყველა მასალას მიიღებენ, შემაჯამებელი ოქმებისა და საკონტროლო ფურცლების ჩათვლით.

გარდა ამისა, თითოეულ უბანს, უსინათლო ამომრჩევლებისათვის, ორი ცალი სპეციალური ლინზა გადაეცემა, ხოლო მხედველობის არ მქონე ამომრჩევლებს, ხმის მიცემა სპეციალური მუყაოს გამოყენებით შეეძლებათ, რომელიც მათ საარჩევნო სუბიექტების რიგითი ნომრის გაგებაში დაეხმარება.

იმ უბნებზე კი, სადაც ხმას ეტლით მოსარგებლე შშმ პირები აძლევენ, სპეციალური კაბინა დაიდგმება.



[თაკო ფეიქრიშვილი, ახალციხე]