საარჩევნო უბნები რიტუალების სახლებიდან სკოლებში გადავიდა

#37 ახალციხის საარჩევნო ოლქში 35 საარჩევნო უბანია, აქედან 13 უბანი ქალაქ ახალციხეში, დანარჩენები კი სოფლებში მდებარეობს.

#37 ახალციხის საოლქო საარჩევნო კომისიის თავმჯდომარე თეა გავაშელი ამბობს, რომ სოფლებში არსებული საარჩევნო უბნების უმეტესობა რიტუალების სახლებსა და ყოფილი საკრებულოს შენობაში იყო განთავსებული. რადგან აღნიშნული შენობები ავარიულ მდგმარეობაშია, უბნები იმავე სოფლების საჯარო სკოლებში გადავიდა.

„გარდა იმისა, რომ შენობები ავარიულია, იქ არ იყო საჭირო ინვენტარი, დენის პრობლემაც გვქონდა. უბნების შეცვლის შესახებ წერილობით მივმართეთ ახალციხის მუნიციპალიტეტის გამგეობას და საკრებულოს და გამოგვიყეს ფართი“,- ამბობს თეა გავაშელი.

სოფლები: აგარა, ანდრიაწმინდა, ელიაწმინდა, კლდე, მინაძე, პამაჯი, ურაველი, ფერსა, წყალთბილა და წყრუთი - ის სოფლებია, სადაც საარჩევნო უბნებმა რიტუალების სახლებიდან სკოლებში გადაინაცვლა.

„ორი უბანი ისევ რიტუალების სახლშია გახსნილი, რადგან აღნიშნულ ტერიტორიაზე ალტერნატიული შენობა არ იყო“, - გვიხსნის გავაშელი.

მისივე თქმით, მისამართი ახალციხეში არსებულმა 32-ე საარჩევნო უბანმაც შეიცვალა. აღნიშნული უბანი თამარაშვილის 5 ნომერში, რესტორან „ტყუპებში“ მდებარეობდა, ახლა კი თამარაშვილის 2 ნომერში, რვასართულიანი კორპუსის პირველ სართულზე გადავიდა.

„კერძო საკუთრება გვქონდა ნაქირავები და 32-ე უბანი იქ გვქონდა განთავსებული. წელს აღნიშნული უბანი თამარაშვილის #2-ში, ისევ ნაქირავებ ფართში გადავიდა“,-ამბობს გავაშელი.

იგივე მიზეზით შეიცვალა მისამართი ადიგენის საარჩევნო ოლქში არსებულმა საარჩევნო უბნებმაც. თუმცა, აქ 18 საარჩევნო უბნიდან ახალ შენობაში მხოლოდ 2 გადავიდა.

„იმის გამო, რომ ბენარის და ბოლაჯურის საარჩევნო უბნები ავარიულ შენობაში იყო განთავსებული, სხვა მისამართზე გადავიდა. ბენარის უბანი იმავე სოფლის სკოლაში, ბოლაჯურის უბანი კი ყოფილი საკრებულოს შენობაში განთავსდა“,-ამბობს #38 ადიგენის საოლქო საარჩევნო კომისიის თავმჯდომარე ჯაბა მაჭარაშვილი.

[მანანა სარაშვილი, ახალციხე]