ადვოკატის თქმით, სადავო მიწის საქმეზე ‘ოცნების’დეპუტატის სიმამრის მოწმეები ეჭვს იწვევს

ახალციხის რაიონულ სასამართლოში დეპუტატ ამბარცუმ ბაბოიანის სიმამრის და მისი მეზობლის საქმის განხილვა გია ბერაიას წასვლის შემდეგ, მოსამართლე ლუიზა თოდუამ გადაიბარა.

მორიგი სასამართლო პორცესი გუშინ, 31 იანვარს გაიმართა.

მოსარჩელე მხარის ადვოკატი ეკა აბაშიძე, ახალციხის მუნიციპალიტეტის მერიის მიწის აღიარების კომისიის განაწყვეტილების ბათილად ცნობას ითხოვს და რიგ დარღვევებზე საუბრობს.

მისი თქმით, 2019 წლის 18 ნოემბერს ადგილზე დათვალიერების ოქმით ნამდვილად დადგინდა, რომ ახალციხეში, მანველიშვილის ქუჩის მიმდებარედ, სადავო მიწის ქვეშ ნამდვილად ქალაქის წყლის კოლექტორი გადის, რაც იმას ნიშნავს, რომ აღიარების კომისიამ აღნიშნული ფაქტი არ შეამოწმა და მიწაზე საკუთრების უფლება ისე მიანიჭა.

გარდა ამისა, დეპუტატის სიმამრის მიერ მიწის აღიარების თანხმობისთვის მიყვანილი სამი მოწმეც ეჭვს იწვევს.

„ნოტარიულად არის ამ სამი კაცის თანხმობა დამოწმებული, თუმცა ისინი სხვადასხვა ქუჩაზე ცხოვრობენ, ეს არის საეჭვო. საკუთრების უფლების აღიარებას ეს არ ექვემდებარება“,- ამბობს აბაშიძე.

პროცესზე იმყოფეოდა ახალციხის მერიის წარმომადგენელი ნათია ნადიბაიძე, მან განაცხადა, რომ მიწის აღიარების კომისიამ ყველაფერი კანონის დაცვით გააკეთა.

„2016 წლის შვიდ სექტემბერს ს.ე–მ მიმართა ახალციხის მერიის მიწის აღიარების კომისიას, კომისიამ განიხილა საკითხი, თანდართული საბუთებით. შესწავლის შემდეგ საეჭვო არაფერი ყოფილა, დაკმაყოფილდა მისი განცხადება. მოგვიანებით, 2017 წლის 27 ოქტომბერს მოსარჩელის დედამ მიმართა კომისიას და უკვე დაკანონებული მიწის თავის სახელზე დაკანონებას ითხოვდა, მას არ ჰქონდა შესაბამისი დოკუმენტები, რითაც ამ მიწის მფლობელობა დაუდასტურდებოდა“,-ამბობს ნადიბაიძე.

მისივე თქმით, დეპუტატის სიმამრს ასევე წყალმომარაგების კომპანიიდან დოკუმენტიც ჰქონდა, რომლითაც დასტურდებოდა, რომ მიწის ქვეშ არაფერი იყო.

მოპასუხე მხარის ადვოკატმა კი განმარტა, რომ კოლექტორი მშენებლობის დროს გამოჩნდა, რიმ შემდეგაც მისმა დაცვის ქვეშ მყოფმა, ახალციხის მუნიციპალიტეტის მერიის ყველა მოთხოვნა გაითვალისწინა.

სადავო მიწის ნაკვეთის უკანონოდ მითვისების საქმეზე, ახალციხის რაიონულ სასამართლოში საჩივარი ადვოკატმა ეკა აბაშიძემ გასული წლის ოქტომბერში შეიტანა. იგი იმ ადგილობრივის ინტერესებს იცავს, რომელიც ამბობს, რომ მანველიშვილის ქუჩაზე მდებარე მიწის ნაკვეთს მისი ოჯახი წლების განმავლობაში ფლობდა და დაკანონებისთვის საქმეც დაწყებული ჰქონდა. თუმცა მოულოდნელად მიწა ახალციხის საკრებულოს დეპუტატის სიმამრმა დაისაკუთრა.

[მარიამ ბარძიმაძე, ახალციხე]