რას აპროტესტებს გოდერძი კუბლაშვილი
„თავისუფალი საქართველოს“ მაჟორიტარი დეპუტატობის კანდიდატმა პროტესტის უკიდურეს ფორმას მას შემდეგ მიმართა, რაც ახალციხის რაიონულმა სასამართლომ, მისი სარჩელი ადიგენის მერიის წინააღმდეგ ნაწილობრივ
დააკმაყოფილა. საქმე ეხება ადიგენის მერიის მიწის აღიარების კომისიის მიერ მიღებულ გადაწყვეტილებას, რომლითაც გოდერძი კუბლაშვილს, თავისი ნაკვეთის მიმდებარედ, მიწის ნაკვეთის საკუთრებაში დარეგისტრირების უფლება არ მისცა. კუბლაშვილი აცხადებს რომ მას ეს მიწა კანონით ეკუთვნოდა, თუმცა აღიარების კომისიამ, მისი პოლიტიკური შეხედულებების გამო, ადიგენის მერის დავალებით, უსამართლო გადაწყვეტილება მიიღო.
გოდერძი კუბლაშვილი სამცხე–ჯავახეთის სამხარეო ადმინისტრაციის შენობასთან ითხოვს, რომ ადიგენის მერიის მიწის აღიარების კომისიის ექვსივე წევრმა სამსახური დატოვოს.
გარდა ამისა, ის ითხოვს სახელმწიფო უსაფრთხოების სამსახურმა შეისწავლოს ადიგენის მუნიციპალიტეტის მერიის ტენდერები.
"მაქვს გონივრული ეჭვი, რომ ადიგენის მუნიციპალიტეტში მიმდინარეობს კორუფციული გარიგებები. ჩემი თვალით ვხედავ, რა ხარისხით სრულდება ინფრასტრუქტურული პროექტები. მოვითხოვ ჩამოიყვანონ სპეციალისტები და გადამოწმდეს ჩატარებული ტენდერები“ – აცხადებს კუბლაშვილი, თუმცა კონკრეტულ შემთხვევებს არ ასახელებს.
მისი თქმით, მოთხოვნების არ შესრულების შემთხვევაში შიმშილობას გააგრძელებს.
რა პოზიცია აქვს ადიგენის მერიას
ადიგენის მერიაში, გოდერძი კუბლაშვილის პროტესტს, სპეკულაციად აფასებენ და ამბობენ, რომ მან პროტესტის ამ ფორმას, საკუთარი თავის პიარისთვის მიმართა, რადგან ის დეპუტატობისთვის იყრის კენჭს.
მიწის აღიარების კომისიის თავმჯდომარე, მამუკა ბუიღლიშვილი, რომლის სამსახურიდან გათავისუფლებასაც კუბლაშვილი ითხოვს, დეპუტატობის კანდიდატის გადაწყვეტილებას პროტესტის თაობაზე ასე აფასებს: „ყველა ადამიანის ჯანმრთელობა და სიცოცხლე ჩემთვის მნიშვნელოვანია. მე ვერ ვხვდები რას აკეთებს [გოდერძი კუბლაშვილი], ერთი ვერსია მაქვს, რაკი დეპუტატობის კანდიდატად იყრის კენჭს, ცდილობს რომ ხალხის და მედიის ყურადღება მიიქციოს. სხვა შემთხვევაში დაელოდებოდა სასამართლოს გადაწყვეტილების ჩაბარებას და კანონის აღსრულებას“.
ბუიღლიშვილის განმარტებით, ის მზადაა დაკავებული თანამდებობა დატოვოს იმ შემთხვევაში, თუ სასამართლოს გადაწყვეტილებაში ეწერება, რომ კომისიამ აუცილებლად უნდა უღიაროს კუბლაშვილს მიწის ნაკვეთი.
„სასამართლოს გადაწყვეტილების ოფიციალურად ჩაბარების შემდეგ, თუ სასამართლო მე დამავალებს, ვუღიარო კუბლაშვილს მიწის ნაკვეთი და თუ ვიქნები გამტყუნებული მაგ საქმეში, მე ჩავატარებ სხდომას, აღვასრულებ სასამართლოს გადაწყვეტილებას და იმ დღესვე დავტოვებ თანამდებობას“ – ამბობს ბუიღლიშვილი და ამატებს რომ სასამართლოს მსგავსი გადაწყვეტილება არ მიუღია.
გარდა ამისა, მიწის აღიარების კომისიის მოქმედი თავმჯდომარე ამტკიცებს, რომ კომისიის საქმიანობაში ადიგენის მერის რაიმე სახით მონაწილეობა სრული აბსურდია. იმავეს ამბობს ადიგენის მერი, ზაქარია ენდელაძეც.
რა ვიცით სასამართლოს გადაწყვეტილების შესახებ
ახალციხის რაიონული სასამართლოს ინფორმაციით, კუბლაშვილისთვის მიწის ნაკვეთის აღიარების საქმეზე, მოსამართლემ დეპუტატობის კანდიდატის სარჩელი
ნაწილობრივ დააკმაყოფილა, რაც იმას ნიშნავს რომ ადიგენის მერიის მიწის აღიარების კომისიამ, კუბლაშვილისთვის მიწის ნაკვეთზე უფლების აღიარების საკითხი ხელახლა განიხილოს და ძველი გადაწყვეტილება, რომლითაც უარი ეთქვა დეპუტატობის კანდიდატს მიწის ნაკვეთის დაკანონებაზე, ბათილად იქნას ცნობილი.
მამუკა ბუიღლიშვილის თქმით, სასამართლოს ეს გადაწყვეტილება, არ ნიშნავს იმას, რომ მიწის აღიარების კომისიამ უკანონო ქმედება ჩაიდინა და ამის გადაჭრით თქმა, სასამართლოს ოფიციალური გადაწყვეტილების ჩაბარებამდე არ იქნება სწორი.
„ამით სასამართლომ კუბლაშვილს მისცა შანსი, სხვა გარემოებებით დაამტკიცოს, რომ მიწის ნაკვეთით ნამდვილად ის სარგებლობდა და ახალი გარემოებების გამოკვეთის შემთხვევაში, კომისიან უღიაროს ან არ უღიაროს მიწის ნაკვეთი“ – განმარტავს ბუიღლიშვილი.
გოდერძი კუბლაშვილი კი აცხადებს, რომ ბუიღლიშვილის ეს პოზიცია, სასამართლოს გადაწყვეტილების წინააღმდეგობას ნიშნავს.
როგორც კუბლაშვილი აცხადებს, პროტესტის პირველსავე დღეს, სამხარეო ადმინისტრაციასთან სამცხე–ჯავახეთის მხარის რწმუნებული შეხვდა. მისი თქმით, ბესიკ ამირანაშვილი საკითხში გარკვევას შეჰპირდა. „სამხრეთის კარიბჭემ“ სამხარეო ადმინისტრაციის პოზიციის გარკვევა ბესიკ ამირანაშვილთან სცადა, თუმცა მან სატელეფონო ზარზე არ გვიპასუხა, სამსახურში კი არ დაგვხვდა.
[რობი ზარიძე]