‘მიწის კომისიის’ თავმჯდომარემ ახალციხეში ნაკვეთი დაიკანონა

მამუკა მიქელაძე, „ქართული ოცნებიდან“ წინა, 2014 წლის მოწვევის საკრებულოს დეპუტატი იყო. იგი „ქართული ოცნების“ ფრაქციას ხელმძღვანელობდა. 2016 წლის პირველ ივლისს კი ეგრეთ წოდებული „მიწის კომისიის“, ანუ, „საკრებულოს ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთზე, საკუთრების უფლების აღიარების კომისიის“ ხელმძღვანელად დაინიშნა.

მამუკა მიქელაძეს აღნიშნული პოზიცია ივლისსა და აგვისტოში ეკავა. ამ პერიოდში მან კომისიაში თამარაშვილის ქუჩაზე N57-ის მიმდებარედ, მიწის დაკანონებასთან დაკავშირებით განაცხადი შეიტანა. კომისიამ მიქელაძის განცხადება, მიქელაძის თავმჯდომარეობითვე, დააკმაყოფილა.
საჯარო რეესტრის ამონაწერის მიხედვით მიქელაძემ აღნიშნული ნაკვეთი 2016 წლის აგვისტოში შეიძინა. მისივე დეკლარაციის მიხედვით, საუბარი 275 კვ.მ. ფართობზეა.

მიწის ნაკვეთზე საკუთრების უფლების აღიარების კომისიაში ოპოზიციური პარტიის წევრები არ ყოფილან. მაშინ, როდესაც მიქელაძის კანდიდატურა ინიშნებოდა, ოპოზიციამ ეს ფაქტი გააპროტესტა. დეპუტატები ითხოვდნენ, რომ კომისიაში უმცირესობის წარმომადგენელიც ყოფილყო.

„ჩვენი წარმომადგენელი რომ ყოფილიყო კომისიაში, საქმე აქამდე არ მივიდოდა. თვითონ იყო კომისიის თავმჯდომარე, თვითონ შეიტანა განცხადება და თვითონვე დაადო რეზოლუცია. ან კომისიის წევრები ვის განცხადებას იხილავდნენ, ვერ მიხვდნენ?!“ – კითხულობს ქალაქის საკრებულოს ყოფილი დეპუტატი „ევროპული საქართველოდან“ მალხაზ გიქოშვილი.

კომისიის მაშინდელი წევრები „სამხრეთის კარიბჭის“ ზარებს არ პასუხობენ. ახალციხის მერიის ყოფილი თანამშრომლები კი აცხადებენ, რომ მიქელაძის საქმეში მინიმუმ ინტერესთა კონფლიქტი იკვეთება: „შეიძლებოდა შეეკავებინა თავი და კომისიისთვის თუნდაც მას შემდეგ მიემართა, რაც თვითონ ამ კომისიის ხელძღვანელი აღარ იქნებოდა“.

მამუკა მიქელაძის საქმეს ფინანსთა სამინისტროს საგამოძიებო სამსახურის სამცხე–ჯავახეთის სამმართველო, სისხლის სამართლის კოდექსის 182–ე მუხლის მეორე ნაწილით იძიებს. ეს მუხლი გულისხმობს მითვისებას ან გაფლანგვას სამსახურეობრივი მდგომარეობის გამოყენებით.

საგამოძიებო უწყება საქმის დეტალებზე არ საუბრობს. გამოძიების დასრულებამდე კომენტარის გაკეთება არ სურს მამუკა მიქელაძესაც: „გამოძიება დასრულდება და ამ საკითხზე ამის შემდეგ ვისაუბრებ, მანამდე არაფრის თქმა არ მინდა“.

მიქელაძე სატელეფონო საუბარში გვიდასტურებს, რომ საქმე ნამდვილად თამარაშვილის ქუჩაზე N57-ის მიმდებარედ არსებულ მიწის ნაკვეთს ეხება.

[თამუნა უჩიძე, ახალციხე]