დეპუტატ ამბარცუმ ბაბოიანის სიმამრის საქმეზე სასამართლო გაიმართა

მოქალაქის ინტერესებს ადვოკატი ეკა აბაშიძე იცავს. იგი მოსამართლე გია ბერაიას წინაშე რამდენიმე შუამდგომლობით წარდგა.

ერთ–ერთი საკითხი, რომელიც აბაშიძემ დააყენა, წყლის კოლექტორს ეხებოდა. კოლექტორის ნაწილი იმ მიწის ქვეშ გადის, რომელიც დეპუტატის სიმამრს აქვს დარეგისტრირებული.

სასამართლოს ესწრებოდა მიწის აღიარების კომისიის წარმომადგენელი დათო სამხარაძე, მისი თქმით, როდესაც პიროვნებას მიწა საკუთრებაში გადასცეს, მოაგროვეს ყველა დოკუმენტი, რითაც ირკვეოდა, რომ მიწის ქვეშ არაფერი იყო. თუმცა მას შემდეგ, რაც მიწაზე მშენებლობა დაიწყეს, კოლექტორის ნაწილი გამოჩნდა.

„ეგ მიწა ჩემს საკუთრებაშია წლებია. მიწა რომელიც მე არ მეკუთვნოდა და დავირეგისტრირე სულ რაღაც 2 მეტრი და 10 სანტიმეტრი იყო. ამ ორი მეტრის გამო მოეწყო ეს სასამართლო, რატო თავის დროზე არ დააყენა საკითხი იმ კაცმა, მე 2017 წელს დავირეგისტრირე. არ ვიცოდი რომ მანდ კლექტორი გადიოდა, მშენებლობა რომ დავიწყე მერე გამოჩნდა, თუმცა მაგას ხელს არ ვუშლი“, – თქვა დეპუტატის ნათესავმა.

ამაზე მოსამართლე ბერაიამ რამდენიმე კითხვით მიმართა მხარეს. „კოლექტორი მოაქციეთ კერძო საკუთრებაში? რამე რომ იყოს, ხვალ სახელმწიფომ და მუნიციპალიტეტმა კერძო საკუთრებას უნდა მიმართოს და თანხა უნდა ვუხადოთ?, – იკითხა ბერაიამ.

ამაზე მხარემ უთხრა, რომ ქალაქში თითქმის ყველა შენობა კოლექტორზე და არხზე დგას.

ამას გარდა, მოსამართლემ მიწის აღიარების კომისიის წარმომადგენლისგან სადავო მიწის ნაკვეთის ადგილის დათვალიერების ოქმი მოითხოვა, რომელიც არ ჰქონდათ. “ოქმის გარდა, საქმეში, ასევე, არ დევს საკუთრების უფლების მოწმობის გაცემის განკარგულება“, – თქვა ბერაიამ.

მოპასუხეს ამ და სხვა კიდევ რამდენიმე საბუთების წარსადგენად მოსამართლემ სამი დღის ვადა მისცა.

ადვოკატმა აბაშიძემ, ასევე, რამდენიმე მოწმის დაკითხვაზე და სადავო მიწის ნაკვეთის დათვალიერებაზე იშუამდგომლა, რაც მოსამართლემ დაუკმაყოფილა.

საქმის განხილვა 22 ოქტომბერს გაგრძელდება.

სადავო მიწის ნაკვეთის უკანონოდ მითვისების საქმეზე, ახალციხის რაიონულ სასამართლოში საჩივარი ადვოკატმა ეკა აბაშიძემ შეიტანა. იგი იმ ადგილობრივის ინტერესებს იცავს, რომელიც ამბობს, რომ მანველიშვილის ქუჩაზე მდებარე მიწის ნაკვეთს მისი ოჯახი წლების განმავლობაში ეპატრონებოდა და დაკანონებისთვის საქმეც დაწყებული იყო, თუმცა მოულოდნელად მიწა ახალციხის საკრებულოს დეპუტატის სიმამრმა დაისაკუთრა.

[მარიამ ბარძიმაძე, ახალციხე]