წინასაარჩევნო კამპანიის ფარგლებში „ერთიანი ნაციონალური მოძრაობის“ პრეზიდენტობის კანდიდატი ახალციხელ ამომრჩეველს მესხეთის სახელმწიფო დრამატულ თეატრში შეხვდა. დავით ბაქრაძემ მოსახლეობას საარჩევნო პროგრამა გააცნო და ბოლო ერთი წლის განმავლობაში განვითარებულ მოვლენებზეც ისაუბრა.
„ძალიან რთული პერიოდი გავიარეთ, ქვეყანაში ისეთი რაღაცეები მოხდა, რასაც ვერ წარმოვიდგენდით. ახლა მეუბნებოდნენ, რომ ახალციხეში სახურავის გადახურვისთვის სისხლის სამართლის საქმეა აღძრული და გამოძიება მიდის სახურავი რატომ შეცვალეო. სახურავის შეცვლას და ქალაქის გალამაზებას ედავებოდე მთავრობას, გაგიგიათ ასეთი რამე? ვანო მერაბიშვილი დაჭერილი იყოს და იმას ედავებოდე, რაც ამ რაიონისთვის, რეგიონისთვის, ამ ხალხისთვის გააკეთა, გაგიგიათ ასეთი რამე? მაგრამ ეს ყველაფერი ბოლო ერთი წლის განმავლობაში მოხდა და მთავარი ის არის, რომ ჩვენ ღირსეულად გადავიტანეთ ყველაზე რთული და წინ აუცილებლად გველოდება გამარჯვება და უკეთესობა, - განაცხადა დავით ბაქრაძემ ახალციხეში ამომრჩეველთან შეხვედრის დროს.
პრეზიდენტობის კანდიდატმა აღნიშნა, რომ როცა მთავრობა იჭერს ვანო მერაბიშვილს იმისთვის, რომ საქმე გააკეთა, ეს ნიშნავს, რომ მაშინ თავად აღარაფერს გააკეთებს: თუ იჭერ ადამიანს, იმისთვის, რომ სახურავი გადახურა ახალციხის ცენტრში, ეს ნიშნავს, რომ შენ ხარ მთავრობა, რომელიც აღარ აპირებ იმ სახურავის გადახურვას. ქვეყანას ისეთი პრეზიდენტი სჭირდება, რომელიც საქმის გამკეთებელ ადამიანებს კი არ დაიჭერს, არამედ მათ დააფასებს“.
მისივე თქმით, ბოლო ერთი წლის განმავლობაში მთავრობა ლანძღვაზე, მუქარასა და დაპირისპირებაზეა გადასული.
„ამ დაპირისპირებაში ჩვენ გვავიწყდება მთავრი, რომ ხალხს სჭირდება გაკეთებული საქმე. ხალხს და ქვეყანას არ სჭირდება გაჩერებული და დაკეტილი რაბათი, არ სჭირდება შეჩერებული ახალციხის ცენტრის რეაბილიტაცია. ყველაზე მნიშვნელოვანია არის ის, რომ აშენებული კი არ დაინგრეს, არამედ დანგრეული აშენდეს. იმიტომ, რომ რაც ამ ერთ წელიწადში ხდება აშნებულის ნგრევაა“, - განაცხადა დავით ბაქრაძემ.
"ერთიანი ნაციონალური მოძრაობის" პრეზიდენტობის კანდიდატის თქმით, ქვეყანას ისეთი პრეზიდენტი და მთავრობა უნდა ჰყავდეს, რომელიც მაღაზიებს და რესტორნებს არ დაკეტავს და ამით ადგილობრივ მოსახლეობას შემოსავლის წყაროს არ შეუწყვეტს.
„თქვენ ჩემზე კარგად იცით, რომ რაბათში დახურულია მაღაზიებიც და რესტორნებიც. მთავრობამ ეს მაღაზიები და რესტორნები კი არ უნდა დახუროს, ეს ცენტრი კი არ უნდა გააჩეროს და საქმე კი არ უნდა აღძრას, სახურავი რომ გადახურეს ამის გამო დაგიჭერთო. პირიქით, მეტი ობიექტი უნდა გახსნას, მეტი სახურავი უნდა გადახუროს, ეს არის მთავრობის მოვალეობა და პრეზიდენტიც ისეთი უნდა იყოს, რომელიც გაკეთებულს და აშენებულს შეინარჩუნებს, სადაც შესაძლებელია იქ პასუხს მოსთხოვს მთავრობას და საქმეს გააკეთებინებს“, - აღნიშნა „ერთიანი ნაციონალური მოძრაობის" პრეზიდენტობის კანდიდატმა.
ახალციხეში შეხვედრის დასრულების შემდგომ დავით ბაქრაძე ამომრჩეველს ვანო მერაბიშვილის მშობლიურ სოფელში უდეში შეხვდა.
[თამარ თოთაძე, ახალციხე]