დავით ბაქრაძე:'უდეში ჩამოსვლით შეცდომა გამოვასწორე'

რაიონული ცენტრის, ადიგენის ნაცვლად, „ნაციონალების“ პრეზიდენტობის კანდიდატი დავით ბაქრაძე ამომრჩეველებს ვანო მერაბიშვილის მშობლიურ სოფელში, უდეში შეხვდა.

„ამ რაიონში ერთ-ერთი ყველაზე დიდი და ძლიერი სოფელია. საქართველოში ძალიან ბევრ სოფელში ვარ ნამყოფი, უდეში არ ვიყავი და ჩათვალეთ, რომ ჩემი შეცდომა გამოვასწორე“,-განუცხადა დავით ბაქრაძემ „სამხრეთის კარიბჭეს“.

ბაქრაძემ ადგილობრივებს ამ სოფლის მკვიდრი ორი დაპატიმრებული ადამიანის, ყოფილი პრემიერ-მინისტრის ვანო მერაბიშვილისა და ადიგენის მუნიციპალიტეტის ყოფილი გამგებლის სიმონ პარუნაშვილის საქმეები შეახსენა და აღნიშნა, რომ არცერთი მათგანის მიმართ საქმე არ უნდა აღძრულიყო.

„დღეს ქვეყანას ღირსეული პოლიცია გვყავს. ადამიანი, რომელიც ასეთ პოლიციას შეუქმნის ქვეყანას, არ შეიძლება ციხეში ჩასვა, იმიტომ რომ შენი პოლიტიკური ოპონენტია. არ არის ეს კარგი ქვეყნისთვის. გული მწყდება იმის გამო, რომ მერაბიშვილს დღეს თავის მართლება უწევს იმ ხალხის წინაშე, ვისაც აგური აგურზე არ დაუდევს ქვეყნისთვის. დღეს ამ სოფლში ვარ და არ შემიძლია კიდევ ერთხელ არ ვუთხრა გამხნევების სიტყვები ვანოს, იმიტომ რომ მისი გაკეთებული საქმე ამ ქვეყანაში არის და კიდევ დიდხანს იქნება. ამიტომ გვჭირდება პრეზიდენტი, რომელიც მსგავს ფაქტებს არ დაუშვებს ქვეყანაში. არ შეიძლება გაკეთებული საქმის გამო დაიჭირო ადიგენის გამგებელი, რომელსაც მერე ბრალსაც ვერ მოუძებნი და გამოუშვებ“, - განაცხადა დავით ბაქრაძემ.

შეგახსენებთ, ვანო მერაბიშვილს სისხლის სამართლის სამი მუხლით (ამომრჩევლის მოსყიდვა, მითვისება/გაფლანგვა და სამსახურებრივი უფლებამოსილების ბოროტად გამოყენება) ედება ბრალი, რაც 12 წლამდე თავისუფლების აღკვეთას ითვალისწინებს. სიმონ პარუნაშვილს კი, რომელიც მიმდინარე წლის 27 აგვისტოს დააკავეს და 3000 ლარის ოდენობის გირაოს სანაცვლოდ გამოუშვეს, სამსახურეობრივი უფლებამოსილების გადამეტებას ედავებიან.

[თინათინ ზაზაძე, ადიგენი]