ახალციხეში შშმ ბავშვების ნამუშევრების გამოფენა მოეწყო

გამოფენა სამოქალაქო საზოგადოება ’ყველა ყველასათვის’ და ფსიქოლოგიური მომსახურების ცენტრის ’მწვანე სახლის’ ერთობლივი ძალებითა და ინიციატივით, ახალციხის ’დემოკრატიული ჩართულობის” ცენტრში გაიმართა. გამოფენაზე მე-7 საჯარო სკოლის მოსწავლეების, დღის ცენტრ, ”ტალიტა კუმის” წარმომადგენლებისა და ცერებრალური დამბლითა და აუტიზმით დაავადებული ბავშვების ნამუშევრები იყო წარმოდგენილი.

’ჩვენ მოვიძიეთ ამ სკოლის სკოლის ბავშვების ნამუშევრები და მათ გამოფენა მოვუწყეთ. ჩვენი მთავარი მიზანია, საზოგადოებას დავანახოთ, რომ ისინი სამყაროს ნაწილი არიან და ჩვენი თანადგომა სჭირდებათ’,- ამბობს სამოქალაქო საზოგადოება ’ყველა ყველასათვის’ აღმასრულებელი დირექტორი შორენა გაბოშვილი.

ფსიქოლოგიური მომსახურების ცენტრის ’მწვანე სახლის’ მენეჯერის ელისო თათეშვილის თქმით, საზოგადოება შეზღუდული შესაძლებლობის მქონე ბავშვებს მხარში უნდა დაუდგეს: ’გამოფენის მიზანი არის ის, რომ საზოგადოებამ ამ ბავშვების თვალით დანახული სამყარო დაინახოს’.

გამოფენას ესწრებოდნენ ნახატების ავტორები, ბავშვების აღმზრდელები, ადგილობრივი არასამთავრობო ორგანიზაციები და თბილისიდან მოწვეული ორგანიზაცია ’ხელმისაწვდომი გარემო ყველასათვის’.

’ხელმისაწვდომი გარემო ყველასათვის’ ერთ-ერთი დამფუძნებელი გურამ ჩხაიძე ამბობს, რომ ამ პრობლემის დაძლევაში ადგილობრივი თვითმმართველობის ჩართულობას ვერ ხედავს: ’ყველა საქმე გადავდე და სპეციალურად ამ გამოფენისთვის ახალციხეში ჩამოვედი. 22 წელია ეტლს მიჯაჭვული ვარ და ძალიან კარგად მესმის რა რთულია, როდესაც შეზრუდული უნარი გაქვს. შეზღუდული შესაძლებლობის მქონე ბავშვებს ჩვენი დახმარება სჭარდებათ. გაოცებული ვარ მათი ნამუშევრებით. შესაძლოა, სრულიად ჯანმრთელმა ადამიანმაც კი ვერ გააკეთოს ეს’.

მე-7 საჯარო სკოლაში 24 მოსწავლე სწავლობს. სკოლის ფსიქოლოგი დალი ასპანიძე ამბობს, რომ ბავშვებთან მუშაობა რთული, თუმცა შედეგიანია: ’მათი ინტეგრაცია საზოგადოებაში ნაკლებად ხდება და ეს უამრავ პრობლემას ქმნის.რაც შეეხება ნამუშევრებს, მათზე აღმზრდელი და მოსწავლე ერთობლივად მუშაობდნენ’.

გამოფენაზე მიწვეული იყვნენ ადგილობრივი თვითმმართველობის წარმომადგენლებიც, თუმცა მათ მოუცლელობის გამო მისვლა ვერ მოახერხეს.

ნამუშევრები ’დემოკრატიული ჩართულობის ცენტრში’ ორი კვირის განმავლობაში დარჩება. ნივთების გაყიდვა დაგეგმილი არ არის.



[ნინო ზედგინიძე, ახალციხე]