ჭელას მეჩეთს ახლადარჩეული მუფთი ესტუმრა

შეხვედრა გუშინ, 11 იანვარს გაიმართა. შანთაძეს 15 წინამძღვარი შეხვდა. მათ რელიგიის კუთხით რეგიონში არსებულ გამოწვევებსა და პრობლემებზე ისაუბრეს.

„ეს იყო პირველი შეხვედრა. ვისაუბრეთ რეგიონში არსებულ პრობლემებზე, გამოწვევებზე რომელიც გვაწუხებს და დგას მუსლიმების წინაშე. მომავალი გვიჩვენებს როგორ განვითარდება მოვლენები. ვისაუბრეთ რელიგიურ საკითხებზე, ეს ჩვენს შიდა საქმიანობას შეეხებოდა. ზოგადად გვაქვს პატარა პრობლემები, მაგალითად არის მეჩეთები, რომელთა რეგისტრაციაც ჯერ ვერ ხერხდება. ასევე ტექნიკური საკითხები, რომლის მოგვარებაშიც იმედი გვაქვს რომ მუფთი დაგვეხმარება“, - გვითხრა ჭელას მეჩეთის იმამმა ჯამბულ აბულაძემ.

შეხვედრაზე ასევე ისაუბრეს ბათუმში ახალი მეჩეთის მშენებლობის საკითხზეც: „გვაინტერესებდა ბათუმში ახალი მეჩეთის მშენებლობის საკითხი. ჩვენ გარკვეული შემოწირულობა გადავრიცხეთ მშენებლობისთვის. ბატონი მუფთი დაგვპირდა, რომ ამ კუთხითაც იმუშავებს“.

მუსლიმთა სამმართველოს რელიგიურმა საბჭომ ახალი მუფთი ადამ შანთაძე 25 დეკემბერს აირჩია.



[მარიამ ბარძიმაძე, ადიგენი]