ადამ შანთაძე: მრევლს სიმშვიდისკენ მოვუწოდეთ

სამცხე-ჯავახეთის მუფთი მამუკა ვაშაყმაძე ამბობს, რომ გუშინ, ადიგენში გამართულ შეხვედრაზე რაიმე გადაწყვეტილება არ მიუღიათ: „მათ ვუთხრი, რომ იქნებ დროულად გადაწყდეს შენობის ბედი და მოსახლეობამ თავისუფლად შეძლოს ლოცვა–მეთქი. ჩვენ არაფერზე შევთანხმებულვართ, რადგან მოსახლეობა მშვიდობიანად ატარებდა ლოცვებს. მუსლიმი მოსახლეობა კომისიას არ ენდობა, იმიტომ, რომ ორი წლის განმავლობაში შედეგი ვერ მიიღეს. ამიტომ თვითნებურად დაიწყეს ლოცვა“.

ადიგენში გამართული შეხვედრის დეტალებზე არ საუბრობს სრულიას საქართველოს მუსლიმთა მუფთის მოადგილე ადამ შანთაძე.

იგი ამბობს, რომ რამდენიმე დღეში სახელმწიფო კომისია კვლავ შეიკრიბება და საკითხი ამის შემდეგ გადაწყდება. რაც შეეხება ახლა მოხეში მიმდინარე მოვლენებს, ადამ შანთაძე ამბობს, რომ მათ მრევლს სიმშვიდისკენ მოუწოდეს: „მოსახლეობას მოვუწოდეთ თავი შეიკავონ ისეთი ქმედებებისგან, რაც შესაძლოა შემდეგ გახდეს მანიპულაციების ან პროვოკაციების მიზეზი, რასაც სერიოზული დაპირისპირება მოჰყვება“.

შეგახსენებთ, მოხეში, რელიგიური კონფლიქტიდან ორი წლის თავზე, მოხეში, სადავო შენობაში მუსლიმებმა ლოცვა ისე დაიწყეს, რომ ჯერ შენობის საკითხი გადაჭრილი არ არის. ოთხდღიანი ლოცვის შემდეგ, დღეს სამართალდამცველებმა შენობის კარი აჭედეს, და პოლიციის ლენტით შემოსაზღვრეს.

საკითხს გამოეხმაურა ახალციხისა და ტაო–კლარჯეთის მიტროპლიტი თეოდორე, რომელმაც ხელისუფლებას მოუწოდა, ყველაფერი გააკეთოს კონფლიქტის თავიდან ასაცილებლად. მანვე განაცხადა, რომ გუშინ, ადიგენში, მხარები შეხვდნენ და მოხის საკითხზე იმსჯელეს.

„სამხრეთის კარიბჭე“ ცდილობდა ამ შეხვედრის დეტალების გარკვევას, თუმცა, ამ ეტაპზე კონკრეტული ინფორმაცია ვერ მოიპოვა. მეუფემ მხოლოდ შეხვედრა ახსენა, დეტალები არ დაუკონკრეტებია, ადიგენის გამგეობაში კომენტარზე უარი თქვეს, ასევე არ გააკეთეს კომენტარი სამუფთო სამმართველოსა და რელიგიის საკითხთა სააგენტოში.

მხარეები ამბობენ, რომ რამდენიმე დღეში კომისია შეიკრიბება და კომენტარებს ამ შეკრების შემდეგ გააკეთებენ.

[ლუბა გიორგაძე, ადიგენი]