კეცხოველის ქუჩაზე პანდუსი, რომლის შუაშიც გარეგანათების ბოძი იყო, მოანგრიეს

„ეს პანდუსი ჩემი ხარჯებით მოვაწყვე, მერე მერიის ტენდერში გამარჯვებულმა კომპანიამ გარეგანათების ბოძები დადგა და ერთი ზუსტად პანდუსის ბოლოში ჩააგდეს. ამის გამო პანდუსი მოსანგრევი გახდა,“ – ამბობს სილამაზის სალონის მესაკუთრე გევორქ მურადიანი.

ახალციხის მერიაში ამბობენ, პანდუსი თვითმმართველობასთან შეთანხმების გარეშე არასწორად გააკეთეს, ამიტომ სილამაზის სალონის მესაკუთრეს მისი მონგრევა სთხოვეს.

შეკითხვაზე, რატომ დადგეს გარე განათების ბოძი პანდუსის შუაში, ან განათების მოწყობის შემდეგ როცა პროექტი ჩაიბარეს, ამას ყურადღება რატომ არ მაიქციეს, ახალციხის მერიიდან პასუხი ვერ მივიღეთ.

"სამხრეთის კარიბჭემ" პანდუსის ფოტო, რომლის შუაშიც გარე განათების ბოძი იდგა, სამ დეკემბერს გამოაქვეყნა და პანდუსი ოთხ დეკემბერს მოანგრიეს.



[ავთო ინასარიძე, ახალციხე]