ნინო ბურჯანაძე: 'იქნება მეორე ტური, სადაც ვიქნებით მე და მარგველაშვილი'

"აბსოლუტური უმრავლესობა იმ ადამიანებისა, რომლებიც მოვიდნენ არჩევნებზე არიან სწორედ ჩვენი მომხრენი, მე მინდა გავამხნევო ეს ადამიანები, მადლობა ვუთხრა და დავარწმუნო იმაში, რომ არჩევნების საბოლოო შედეგები იქნება ობიექტური, რაც ნიშნავს იმას, რომ ნაადრევია ვინმეს ზეიმი პირველ ტურში გამარჯვებასთან დაკავშირებით. მე მინდა ჩვენს დამკვირვებლებს და თითოეულ იმ ადამიანს, ვინც სხვადასხვა უბანზე მუშაობს, მოვუწოდო ყველაფერი გააკეთონ იმისათვის, რომ დაიცვან თითოეული ის ხმა, რომელიც ჩვენ მოგვცა ამომრჩეველმა.

ჩვენ გვაქვს ძალიან ბევრი სწორი ინფორმაცია იმასთან დაკავშირებით, რომ ძალიან ბევრ უბნებზე ჩვენ ვართ პირველ ადგილზე. მე არ მგონია საქართველოში დღეს ვინმეს სჯეროდეს ეგზით–პოლების შედეგების. ქვეყანაში, სადაც არ მუშაობს სოციოლოგია და არასოდეს არცერთი სოციოლოგიური კვლევის შედეგი არ აჩვენებს მოსახლეობის რეალურ განწყობას, ბუნებრივია, არ მუშაობს არც ეგზით–პოლები", - განაცხადა ნინო ბურჯანაძემ.

მისივე განცხადებით, იწყებენ პარალელური დათვლის სისტემას: „ქართული ოცნების“ ოფისშიც არიან წესიერი ადამიანები, რომლებმაც იციან, რომ ჯერ არჩევნები არ დასრულებულა, პირველი ტური ნამდვილად არ ამთავრებს ამ არჩევნებს, იქნება მეორე ტური, სადაც ვიქნებით მე და მარგველაშვილი. იმედი მაქვს, რომ ბიძინა ივანიშვილი და „ქართული ოცნება“ არ წავლენ ტოტალურ გაყალბებაზე".

ბურჯანაძემ საუბნო კომისიის წარმომადგენლებს მოუწოდებს, არ გააყალბონ არჩევნები: "დადეთ ის შედეგები, რაც არის რეალური. მინდა მოვუწოდო ჩვენს წარმომადგენლებს, არავითარ შემთხვევაში არ დაყაროთ ფარ–ხმალი".

[sknews.ge]