პრეზიდენტობის კანდიდატი ნინო ბურჯანაძე ახალქალაქსა და ნინოწმინდას დღეს, 11 ოქტომბერს სტუმრობდა. დღის პირველ ნახევარში იგი ნინოწმინდაში იმყოფებოდა, დღის მეორე ნახევარში კი ახალქალაქში, ქალაქის ცენტრალურ ბაღში შეკრებილ მოქალაქეებს შეხვდა. მისი გამოსვლისას ცენტრალურ პარკს „ქართული ოცნების“ დროშებით, საყვირების ფონზე, ავტომანქანებმა ჩაუარეს.
პარტია „დემოკრატიული მოძრაობა - ერთიანი საქართველოს“ ლიდერმა ადგილობრივ მოსახლეობას არაერთი დაპირება მისცა, მათ შორის, სასკოლო პროგრამების გადახედვისა და საბჭოთა დროის შემნახველ სალაროებში გაუფასურებული თანხების დაბრუნების შესახებ.
ნინო ბურჯანაძესთან შესახვედრად ახალქალაქიდან და მუნიციპალიტეტის სხვადასხვა სოფლებიდან, ხელნაწერი პლაკატებით - „სამართლიანობის აღდგენა ყველას“, 300-ზე მეტი მოქალაქე შეიკრიბა.
ნინო ბურჯანაძე შეკრებილებთან დაახლოებით 15:00 საათზე მივიდა. პრეზიდენტობის კანდიდატმა „ნაციონალური მოძრაობის“ მმართველობაზე ისაუბრა, „ქართული ოცნება“ ყოფილ ხელისუფლებასთან კოჰაბიტაციაში დაადანაშაულა და ხალხს სამართლიანობის აღდგენას დაჰპირდა.
„ის ხალხი, ვინც კანონს არღვევდა, პასუხისმგებაში უნდა მიეცეს. ვინ არის სინამდვილეში კრემლის აგენტი და ვინ შემოიყვანა საქართველოს ტერიტორიაზე რუსული ტანკები 2008 წელს, ამის ახსნა თქვენ არ გჭირდებათ“, - განაცხადა ბურჯანაძემ. მან ისაუბრა ომზე და აღნიშნა, რომ მის გამო საქართველომ ტერიტორიის 20% დაკარგა, „შეიძინა“ ახალი დევნილები და ეკონომიკურ კრიზისში აღმოჩნდა.
ნინო ბურჯანაძის დაპირებებს შორის იყო ისიც, რომ სააკაშვილი, მეგობრებთან ერთად, აუცილებლად ჩაჯდება ციხეში, რასაც შეკრებილები აპლოდისმენტებით შეხვდნენ. თუმცა, კანდიდატის თქმით, სამართლიანობის აღდგენა არის კიდევ მაღალი პენსიაც და ბურჯანაძე ხალხს დაჰპირდა, რომ დააბრუნებს იმ 7-9 მილიარდს, რომელიც „სახელმწიფო ბიუჯეტიდან „ნაციონალური მოძრაობის“ ხელით გავიდა“.
ბურჯანაძემ ისაუბრა თვითმმართველობის პრობლემებზე. მან აღნიშნა, რომ ეს პრობლემები ყველგანაა და ის მცხოვრებთა გვარებზე დამოკიდებული არაა: „ეს პრობლემები შეიძლება მხოლოდ სწორი ცენტრალიზებული მართვით გადაწყდეს. ცენტრალიზებული მართვა არ ნიშნავს, რომ ადგილობრივი თვითმმართველობა აქტიურად არ იქნება ჩართული. პირიქით, ჩვენთან იქნება ადგილობრივი თვითმმართველობის არჩევნები და ამ არჩევნებზე ძალიან დიდი მნიშვნელობა ექნება, რომ თქვენ აირჩიოთ ის ადამიანები, ვისაც მართლა ენდობით“.
ბურჯანაძემ განაცხადა, რომ ნანობს, რომ ადგილობრივ მოსახლეობას სომხურ ენაზე ვერ ესაუბრება. რუსულ ენას ძალიან დიდ პატივს სცემს, მაგრამ მისთვის მნიშვნელოვანია, რომ ხალხს ქართულ ენაზე ელაპარაკებოდეს და დაამატა, რომ ამას სახელმწიფოსთვის აქვს დიდი მნიშვნელობა: „ძალიან მიხარია, რომ ხალხი ამას გაგებით ეკიდება, თავად ესმით ეს საკითხი. ჩვენ პატივისცემით ვეპყრობით საქართველოში მცხოვრები ყველა ხალხის ენას. მათ მშობლიური ენა უნდა იცოდნენ, თუმცა, იმავდროულად, სახელმწიფო ენასაც უნდა ფლობდნენ, რათა თავს ჩვენი ქვეყნის აბსოლუტურ მოქალაქეებად გრძნობდნენ“.
ბურჯანაძემ ჯავახეთის მცხოვრებლებს აუხსნა, რომ მისი სააგიტაციო გაზეთი სომხურად გადათარგმნილი არ არის და ეს მხოლოდ იმიტომ, რომ ვერ მოასწრეს.
მას შემდეგ რაც მიმართვა დაასრულა, ბურჯანაძემ ხალხის კითხვებს უპასუხა. ერთ-ერთი კითხვა რკინიგზის მშენებლობაზე დასაქმებული კარწახელების გადაუხდელ ანაზღაურებას ეხებოდა. კანდიდატი მოსახლეობას ამ საკითხში გარკვევას დაჰპირდა.
ახალქალაქის მცხოვრებლებმა პრეზიდენტობის კანდიდატს სასკოლო პროგრამიდან ამოღებული სომხეთის ისტორიის შესახებაც ჰკითხეს. შეგახსენებთ, გიორგი მარგველაშვილი განათლების მინისტრის თანამდებობაზე ყოფნისას ჯავახეთის მცხოვრებლებს ამ საკითხის მოგვარებას დაპირდა, მაგრამ საგანი სკოლებში ჯერჯერობით მაინც არ არის შეტანილი. კითხვის ავტორმა ბურჯანაძეს სთხოვა დაპირებოდა, რომ როდესაც პრეზიდენტი გახდება, სასკოლო პროგრამაში სომხეთის ისტორიას შეიტანენ. თხოვნაზე ბურჯანაძემ ქალბატონს უპასუხა, რომ „თავზარდაცემული იყო, როდესაც გაიგო, რომ სკოლებში საქართველოს ისტორიასაც არ გადიან. საჭიროა გაირკვეს, ვის აწყობს, რომ ბავშვებმა ისტორია არ იცოდნენ და საერთოდ, სკოლებში ბევრი რამ უნდა გადაიხედოს“.
ბურჯანაძეს შეხვედრაზე საბჭოთა პერიოდის გაუფასურებულ ანაბრებზეც ჰკითხეს. კანდიდატმა განაცხადა, რომ ქვეყანა უკვე მზადაა ხალხს ეს ფული ნაწილ-ნაწილ დაუბრუნოს და ეს საკითხი იქნება ერთ-ერთი პირველი, რომელსაც იგი დააყენებს.
შეხვედრის დასასრულს კი ნინო ბურჯანაძემ განაცხადა, რომ ყველა ეს საკითხი მაშინ მოგვარდება, როდესაც იქნება სწორი სისტემა და ამ სწორ სისტემას თავად ააშენებს.
[sknews.ge]