ბურჯანაძის შტაბი პლაკატების ჩამოხევაში „ოცნებას“ ადანაშაულებს

ნინო ბურჯანაძის ახალციხის შტაბმა საპრეზიდენტო კანდიდატის პლაკატების გაკვრა რამდენიმე დღის წინ დაიწყო. გაკვრიდან მეორე დღეს კი პლაკატები ჩამოხეული დახვდათ. ნინო ბურჯანაძის სარეკლამო მასალა არამხოლოდ ახალციხეში, ახალციხის სოფლებსა და ადიგენშიც ჩამოხიეს.

„დემოკრატიული მოძრაობა - ერთიანი საქართველოსთვის“ ახალციხის საარჩევნო შტაბში ვარაუდობენ, რომ პლაკატები ნინო ბურჯანაძის ერთ-ერთი ოპონენტის გიორგი მარგველაშვილის საარჩევნო შტაბის წევრებმა, „ქართული ოცნების“ აქტივისტებმა ჩამოხიეს.

„ჩვენმა აქტივისტებმა დაინახეს კიდეც, რომ „ოცნების“ მხარდამჭერები ხევდნენ პლაკატებს“, - ამბობს „დემოკრატიული მოძრაობა - ერთიანი საქართველოსთვის“ ახალციხის საარჩევნო შტაბის უფროსი გაგა ივანიძე.

„ქართული ოცნების“ ახალციხის შტაბში ამ ბრალდებას კატეგორიულად უარყოფენ და ამბობენ, რომ მსგავს პოლიტიკას არ ატარებენ.

„თუ ვინმემ მართლა ჩამოხია, ჩვენ აქტივისტებს რატომ აბრალებენ?! დააბრალონ იმ პოლიტიკას, რა პოლიტიკასაც ბურჯანაძის პარტია ატარებს. მე ვერც ვადასტურებ, ვერც უარვყოფ იმას, რომ ჩამოხიეს. მაგრამ, შესაძლებელია უბრალო ამომრჩეველს არ მოსწონს მათი გატარებული პოლიტიკა, არც წარსული, არც დღევანდელი და არც მომავალი, რა პროგრამაც წარადგინეს, აქედან გამომდინარე, არ გამოვრიცხავ, რომ პლაკატები ამომრჩეველმა ჩამოხია, - ამბობს „ქართული ოცნების“ ახალციხის შტაბის უფროსი მალხაზ ჟუჟუნაძე და ამატებს, რომ წინასაარჩევნო პერიოდი მშვიდად მიმდინარეობს და ასეთი დემოკრატიული წინასაარჩევნო პერიოდი ქვეყანაში არასდროს ყოფილა.

„დემოკრატიული მოძრაობა - ერთიანი საქართველოსთვის“ ახალციხის საარჩევნო შტაბში ამბობენ, რომ აღნიშნულ ფაქტს აუცილებლად მოყვება შესაბამისი რეაგირება.

„ამაზე აუცილებლად გაკეთდება განცხადება და შემდგომ შესაბამისი ორგანოებიდან მოყვება რეაგირებები“, - ამბობს გაგა ივანიძე.

შეგახსენებთ, პლაკატები ადიგენშიც ჩამოხიეს და ამის შესახებ ადიგენის შტაბმა უკვე მიაწოდა ინფორმაცია არასამთავრობო ორგანიზაციებს.

[თამარ თოთაძე, ახალციხე]