იუსტიციის მინისტრის დაგეგმილი ვიზიტი ვალეში და დახეული პლაკატები

ვალეში, დღეს, იუსტიციის მინისტრს, თეა წულუკიანს ელოდებიან. მინისტრმა ვალეში საზოგადოებრივი ცენტრი უნდა გახსნას.

„ერთიანი ნაციონალური მოძაობის“ აქტივისტი ნიკოლოზ ხიზაძე ამბობს, რომ პლაკატები სავარაუდოდ გამთენიასაა ჩამოხეული: „დილის 04:30–დან 06:30 საათამდე შუალედში გააკეთეს, ვალეს გარდა მიმდებარე სოფლებშიც ჩამოხიეს“.

მისი თქმით, პლაკატების ასე მასიურად ჩამოხევა ვალეში იუსტიციის მინისტრის ჩამოსვლას უკავშირდება.

„დღეს საღამოს მოდის წულუკიანი და დაახვედრეს გასუფთავებული. ყველა ოპოზიციური პარტიის პლაკატი ახეულია. მარტო „ოცნების“ პლაკატებია გაკრული. დღეს მივყვებით და ისევ ვაკრავთ“, – ამბობს ნიკოლოზ ხიზაძე და ამატებს, რომ პლაკატებს ვალეში ახალციხის შტაბის წარმომადგენლები ხევენ: „ვალის შტაბში ვინც არიან, ახლობლები არიან და ამბობენ, რომ ისინი არ ხევენ. ეს მოდის ახალციხიდან“.
„ქართული ოცნების“ ახალციხის შტაბის ხალმძღვანელი გიორგი გვარამაძე „ნაციონალების“ ბრალდებას უსაფუძვლოს უწოდებს.

„ათას რამეს ამბობენ. პლაკატებთან დაკავშირებით არის ომი, არცერთი პარტიისას არ აჩერებენ გაკრულს. ვინ ვისი რა დახია, ნამდვილად არ ვიცი. ჩვენი პლაკატების დახევის ფაქტებიც არის, თუმცა ამ საქმისთვის არ გვცალია. ჩვენ ამ ფაქტს არ ვადასტურებთ“, – ამბობს გვარამაძე.

„ნაციონალური მოძრაობის“ აქტივისტები კი აცხადებენ, რომ აღნიშნული ფაქტების დამადასტურებელი ფოტომასალაც აქვთ.

„ვიცით ვინც მოდის და ვინც დაყვება. დავაფიქსირეთ მარშუტკით იყვნენ და კიბე დაჰქონდათ. ფოტოებიც გვაქვს, ამ ყველაფერს როცა საჭიროა, მაშინ გავავრცლებთ“, – ამბობს ნიკოლოზ ხიზაძე.












[თინათინ ზაზაძე, ახალციხე]