'ოცნების' ახალციხის შტაბი: 90-იანი წლების შემდეგ ასეთი არჩევნები არ ჩატარებულა

"როგორი არჩევნებიც ახლა ტარდება, მშვიდი და დემოკრატიული, 90-იანი წლების შემდეგ საქართველოში არ ჩატარებულა. ყველა საღად მოაზროვნე ადამიანის პოზიცია ესაა", - ამბობს "ქართული ოცნების" ახალციხის საარჩევნო შტაბის ხელმძღვანელი მალხაზ ჟუჟუნაძე.

მისივე თქმით, შტაბში იმყოფებოდნენ სადამკვირვებლო ორგანიზაციების: ეუთოს, IRI-ს და NDI-ს წარმომადგენლები, რომელბიც ასევე აცხადებენ, რომ არჩევნების მიმდინარეობით კმაყოფილები არიან და არჩევნების ჩატარების პროცედურები მიდის უკეთესობისკენ, ვიდრე ეს იყო გასულ წლებში.

"ყველაფერი, რა თქმა უნდა, იდეალური არ არის და ამაზე პრეტენზიაც არავის შეიძლება ჰქონდეს, მაგრამ, ნელ-ნელა სწორდება სიტუაცია", - ამბობს მალხაზ ჟუჟუნაძე.

რაც შეეხება კითხვას, რა ტიპის დარღვევები დააფიქსირეს მათმა წარმომადგენლებმა უბნებზე და დაწერეს თუ არა საჩივრები, ჟუჟუნაძე ამბობს, რომ ამ ეტაპზე ინფორმაცია არ აქვს: "ვიცი რომ აწყურში "ოცნების" წარმომადგენლებს ჰქონდათ რაღაც პრეტენზიები, მაგრამ კომენტარის გაკეთება არ შემიძლია, რადგან საქმის კურსში არ ვარ".

ამავე შტაბის აქტივის კოორდინატორი გოჩა პარუნაშვილი აცხადებს, რომ დილიდან ბურჯანაძის მხარდამჭერები მანქანებითა და რუპორებით დარბიან და აგიტაციას ეწევიან.

მსგავსი შემთხვევები სხვა მუნიციპალიტეტებშიც დაფიქსირდა, თუმცა, შეგახსენებთ, რომ "საარჩევნო კოდექსის” 45-ე მუხლის მე-11 პუნქტის თანახმად, წინასაარჩევნო აგიტაცია აკრძალულია მხოლოდ და მხოლოდ კენჭისყრის შენობაში.

[sknews.ge]