ახალციხეში შშმ პირთა ნამუშევრების გამოფენა–გაყიდვა გაიმართება

ახალციხის ცენტრალურ პარკში შშმ პირები საახალწლო თემაზე შექმნილ ნამუშევრებს 12:30 საათისთვის გამოფენენ. მათი შეძენა ნებისმიერ მსურველს შეეძლება.

ნამუშევრები შშმ პირთა სარეაბილიტაციო ცენტრის ,,ტალიტა–კუმის“ 16–მა აღსაზრდელმა მოამზადა. ისინი დღის ცენტრში არტ–თერაპიის კურსს გადიან და სხვადასხვა ხელსაქმეს სწავლობენ.

,,ტალიტა კუმის“ ადმინისტრაცია გამოფენაზე სხვადასხვა სახის დეკორაციული ნივთების გამოფენას გეგმავს. მათ შორის იქნება თექის, გობელენის, ბისერების და სხვა მასალებისაგან შექმნილი ნაკეთობები.

"საშობაო–საახალწლო გამოფენას ცენტრალურ პარკში პირველად ვაკეთებთ. ფასები სიმბოლური იქნება. შემოსულ თანხას ისევ სხვადასხვა მასალის შესაძენად მოვიხმართ“– ამბობს ,,ტალიტა კუმის“ წარმომადგენელი მელანო ჩილინგარაშვილი.

[თაკო ფეიქრიშვილი, ახალციხე]