რატომ დაეკისრებათ საპროექტო ორგანიზაციებს სანქციები

ამის შესახებ მთავრობის კანცელარიის რეგიონულ და თვითმმართველობის ორგანოებთან ურთიერთობის დეპარტამენტის თავმჯდომარემ ირაკლი მელაშვილმა განაცხადა.

დღეს, 13 ოქტომბერს, ირაკლი მელაშვილი სამცხე-ჯავახეთის ყველა მუნიციპალიტეტის გამგებელს შეხვდა. შეხვედრის მიზანი რეგიონში განხორციელებული, მიმდინარე და სამომავლოდ დაგეგმილი ინფრასტრუქტურული პროექტების შესახებ საკითხების განხილვა იყო.

„სოფელში წყალს რომ გაიყვან და წყალი არ მივა, ბუნებრივია, ამის გამო დამპროექტებელს პასუხი მოეთხოვება“, - აცხადებს მელაშვილი.

მისი თქმით, ამ თვალსაზრისით ისე, როგორც მთელ საქართველოში, რამდენიმე პროექტი სამცხე-ჯავახეთშიც გამოიკვეთა.

„პირველ რიგში პრობლემები იყო საპროექტო ორგანიზაციებთან. რამდენიმე მათგანმა ხარისხიანად ვერ შეასრულა სამუშაოები, რაც გავლენას ახდენს ინფრასტრუქტურული პროექტების განხორციელებაზე. რეგიონში ყველაზე მთავარი პრობლემა საპროექტო ორგანიზაციებს უკავშირდებოდა“, - ამბობს მელაშვილი და ამატებს, რომ შედგება სია ასეთი საპროექტო ორგანიზაციების, - ეს იმიტომ, რომ მათ გარკვეული სანქციები დავუწესოთ. ყველამ უნდა იცოდეს, სახელმწიფო თანხას რომ გამოყოფს, ის ეფექტურად უნდა დაიხარჯოს“.

მისივე თქმით, სამცხე-ჯავახეთთან შედარებით სერიოზული ჩამორჩენაა სხვა რეგიონებშიც: „ეს ხარვეზები ახლა სწორდება“.

გარდა ცუდად შესრულებული პრექტებისა, მელაშვილმა გამგებლებისგან მომავალი წლის პრიორიტეტების შესახებაც მოისმინა. მან კიდევ ერთხელ გააცნო გამგებლებს უწყებათაშორისი კომისიის დოკუმენტი.

„რომელიც ძალიან მკაცრ რეგლამენტაციას ახდენს გამგეობის თნამშრომლების ქმედებებზე წინასაარჩევნო პერიოდში. კიდევ ერთხელ განვუმარტეთ გამგეობის თანამშრომლებს, რომ მათ არ აქვთ უფლება ჩაერთონ წინასაარჩევნო კამპანიაში“, - დასძენს ირაკლი მელაშვილი.

[თამუნა უჩიძე, ახალციხე]