კოალიცია ”არჩევანის თავისუფლებისთვის” რვა ორგანიზაციასა და ორ ექსპერტს აერთიანებს. ახალციხის დემოკრატიული ჩართულობის ცენტრში გამართული შეხვედრის მიზანი იყო, კოალიციის წარმომადგენლებს საზოგადოებისთვის მეტი ინფორმაცია მიეწოდებინათ კამპანია ”ეს შენ გეხებას” მიზნებსა და სამოქმედო გეგმებზე.
შეხვედრას კოალიცია „არჩევნის თავისუფლებისთვის“ წევრები, ადგილობრივი არასამთავრობო და მედია ორგანიზაციებისა და პოლიტიკური პარტიების წამორმადგენლები ესწრებოდნენ. აქვე კოალიციის წამომადგენლებმა ახალციხეში საკუთარი კოორდინატორიც დაასახელეს.
შეხვედრაზე ყურადღება ე.წ. must carry-ისა და must offer-ის პრინციპების კანონმდებლობაში ასახვის საკითხებზე, კანონში შეტანილი ცვლილებების დადებით და უარყოფით მხარეებზე გამახვილდა. აგრეთვე, პოლიტიკური პარტიების ქცევის კოდექსზე საარჩევნო პერიოდში.
- ”ძალიან საინტერესო და აქტიური შეხვედრა იყო, კმაყოფილები ვართ და ამან კიდევ ერთხელ დაადასტურა, რომ რეგიონებში ძალიან აქტიური მუშაობაა საჭირო. მნიშვნელოვანია, რომ იყოს მჭიდრო კონტაქტი თბილისისა და ადგილობრივ ორგანიზაციებს შორის. მოხდეს აზრთა გაცვლა-გამოცვლა და ამ პრობლემატიკაზე მუშაობა, იმისათვის, რომ საზოგადოებრივი ცხოვრება გამოცოცხლებული იყოს არამარტო თბილისში, არამედ რეგიონებშიც”, - ამბობს კოალიცია ”არჩევანის თავისუფლებისთვის” წევრი, ექსპერტი საარჩევნო საკითხებში ირაკლი მელაშვილი.
შეხვედრის მონაწილეებმა საარჩევნო გარემოსთან დაკავშირებულ პრობლემებსა და მის გაჯანსაღების აუცილებლობაზეც ისაუბრეს. ადგილობრივმა სამოქალაქო საზოგადოების წარმომადგენლებმა ერთ-ერთ მთავარ პრობლემად პოლიტიკური პარტიების პასიურობა დაასახელეს.
- ”რეგიონში პოლიტიკური სიტუაცია აბსოლიტურად მკვდარია, ოპოზიცია არ აქტიურობს და თავად ჟურნალისტებიც კი ამბობენ, რომ ფაქტიურად რეგიონში მოახლოვებული არჩევნები არ იგრძნობა. თუ წინასაარჩევნო პერიოდში არ შეიმჩვნევა ოპოზიციისა და საზოგადოების აქტიურობა, მითუმეტეს არ იქნება არჩევნების პერიოდში. რაც თავად ოპოზიციური გაერთიანებების სისუსტეა”, - ამბობს ირაკლი მელაშვილი.
გარდა ამისა, შეხვედრის მონაწილეებმა აღნიშნეს, რომ რეგიონში ინფორმაციის ნაკლებობაც იგრძნობა.
- ”საზოგადოება არ ფლობს ყველანაირ ინფორმაციას და სწორედ ეს არის მნიშვნელოვანი პრობლემა ადგილობრივი მოსახლეობისთვის. ამავდროულად, არჩევნებთან დაკავშირებით მოსახლეობა ინდიფერენტულად არის განწყობილი და საარჩევნო პროცესში ჩართული არაა. გარდა ამისა, არ არიან ისეთი ადგილობრივი არასამთავრობო ორგანიზაციები, რომლებიც ამ კუთხით მუშაობენ, - განმარტავს კოალიცია ”არჩევანის თავისფულებისთვის” წევრი მურმან პატარაია და ამატებს, რომ სწორედ ეს არის მიზეზები, რამაც გამოწვია ის, რომ საზოგადოება საარჩევნო პროცესში აქტიურ მონაწილეობას არ იღებს: თუმცა გამოვყოფდი ჟურნალისტებს, რომლებიც საკმაოდ აქტიურად აშუქებენ მიმდინარე მოვლენებს, მაგრამ ზოგადად მოსახლეობის ჩართულობის დიდი პრობლემაა”.
მსაგვსი შეხვედრები საქართველოს სხვადასხვა რეგიონში უკვე ჩატარდა. კოალიცია ”არჩევანის თავისუფლებისთვის” სამომავლოდ სამცხე-ჯავახეთში სადამკვირვებლო მისიას და ტრენინგების ჩატარებასაც გეგმავს.
[თამარ თოთაძე, ახალციხე]