ირაკლი შიხიაშვილი სამცხე–ჯავახეთის ვეტერანებს შეხვდა

შეხვედრა დღეს, 8 ნოემბერს, მესხეთის (ახალციხის) სახელმწიფო დრამატულ თეატრში გაიმართა. რეგიონის თითქმის ყველა მუნიციპალიტეტში მცხოვრები ვეტერანები ახალციხეში ვეტერანთა საქმეების სახელმწიფო სამსახურის ხელმძღვანელთან შესახვედრად და საკუთარი პრობლემების მოსაყოლად ჩამოვიდნენ.

"ვეტერანებს ძალიან ბევრი პრობლემა აქვთ, პირველ რიგში ეს არის უმუშევრობა. ვეტერანების უმეტესობა დაუსაქმებელია. არიან ადამიანები, რომლებსაც პენსიაც არ აქვთ. რაიონებში მიწები აქვთ და რაღაც შემოსავალი მაინც აქვთ, მაგრამ თბილისში ესეც არ აქვთ", – ამბობს ბეგლარ მიქუტიშვილი.

ვეტერანთა საქმეების სახელმწიფო სამსახურის ხელმძღვანელი შეხვედრებს საქართველოს ყველა რეგიონში მართავს. ირაკლი შიხიაშვილის თქმით, ძირითადი პრობლემა რაც დღეს ვეტერანებს აწუხებთ, ეს არის დასაქმებისა და ჯანმრთელობის მოწესრიგების პრობლემა.

"ჩვენ პრიორიტეტები სწორედ ამისკენ გვაქვს მიმართული. ივსება კითხვარები, რომელიც მოგვცემს სრულყოფილი კვლევის ჩატარების საშუალებას. ვმუშაობთ უკვე სიტუაციურ ანალიზზე, იმისათვის, რომ სტრატეგია შევქმნათ, რომლის საშუალებითაც გვექნება პროექტები. ამ პროექტების განხორციელების შემდეგ ამ პრობლემებს მაქსიმალური ყურადღება უნდა მიექცეს თითოეულ რეგიონში", – განაცხადა ირაკლი შიხიაშვილმა.

ვეტერანებმა დღეს ყურადღება 22-ლარიან დახმარებაზეც გაამახვილეს, რომელსაც ისინი სახელმწიფოსგან ყოველთვიურად იღებენ.

“ჯერ ვსწავლობთ ამ პრობლემას და მერე მაქსიმუმს გავაკეთებთ, რისი საშუალებაც გვექნება", – ამბობს ირაკლი შიხიაშვილი.

ვეტერანებთან შეხვედრას ესწრებოდნენ მხარის გუბერნატორი და რეგიონის შვიდივე მუნიციპალიტეტის ხელმძღვანელი პირები.

ქალაქ ახალციხის მერის გიორგი კოპაძის თქმით, სამომავლოდ შეიქმნება ახალი პროგრამები, რომლებიც სპეციალურად ვეტერანებისთვის იქნება განსაზღვრული.

"სულ მალე იქნება პრეცედენტი, როცა მხოლოდ ვეტერანებს მივიღებთ სამსახურში. გარდა ამისა ქალაქში დაიდგმება მემორიალები და უფრო მეტი ყურადღება მიექცევა მათ", – განაცხადა გიორგი კოპაძემ.



[თამარ თოთაძე, ახალციხე]