მუნიციპალიტეტები ინფრასტრუქტურული პროექტების განხორციელებას იწყებენ

საქართველოს რეგიონული განვითარების და ინფრასტრუქტურის სამინისტრომ ინფრასტრუქტურული პროექტებისთვის პირველ ეტაპზე 135 მილიონი ლარი გამოყო, აქედან სამცხე-ჯავახეთში 11,570,015 ლარის ღირებულების 25 პროექტი დამტკიცდა. მათ შორის 18 პროექტი გზებისა და ხიდების რეაბილიტაციას, 2 პროექტი წყლის სისტემის მოწესრიგებას, 5 პროექტი კი ეზოებისა და სხვა ინფრასტრუქტურის მოწერიგებას გულისხმობს.

ახალციხის მუნიციპალიტეტში პირველ ეტაპზე 7 პროექტი დაფინანსდა, რისთვისაც 4,600,000 ლარი გამოიყო. თუმცა, როგორც ადგილობრივ თვითმართველობაში განმარტავენ ამ ეტაპზე ჯერ კიდევ არ არის გარკვეული კონკრეტულად რა სამუშაოები შესრულდება.

ორი პროექტი დაფინანსდა ადიგენის მუნიციპალიტეტში; დაბა ადიგენის ქუჩების მოასფალტება და სოფლების - ვარხანისა და წახანის მოასფალტება, რისთვისაც 994 ათასი ლარი უკვე გამოიყო.

როგორც ადიგენის მუნიციპალიტეტის გამგებლის მოვალეობის შემსრულებელი არსენ ბალახაშვილი ამბობს, მეორე ეტაპისთვის კიდევ სამი პროექტი აქვთ მზად.

„იგეგმება სოფელ ადიგენის გზის რეაბილიტაცია, სოფელ ჩორჩანის საკრებულოს სამივე სოფლისა და ასევე, სოფელ მლაშის სასმელი წყლის სისტემების რებილიტაცია, - განმარტავს არსენ ბალახაშვილი და აქვე ამატებს, რომ უკვე დამტკიცებული პროექტების განხორციელებას უახლოეს მომავალში დაიწყებენ: გუშინ მოგვივიდა მთავრობის დადგენილება. საპროექტი სამუშაოებისთვის 30 ათასი ლარი უკვე გამოიყო. რამდენიმე დღეში კი საპროექტო სამუშაოებზე ტენდერსაც გამოვაცხადებთ“.

საქართველოს რეგიონული განვითარებისა და ინფრასტრუქტურის სამინისტრომ ორი პროექტი დააფინანსა ასპინძის მუნიციპალიტეტშიც. პირველ ეტაპზე დაგეგმილია სოფელ ხიზაბავრასა და დამალას გზების რეაბილიტაცია.

„სამინისტროსთან ორი პროექტი კიდევ გვაქვს შეთანხმებული, ასპინძის შიდა ქუჩების რეაბილიტაცია და საკანალიზაციო შემკრები სისტემის გაკეთება“, - ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი.

რეგიონში განსახორციელებელი პროექტების ფონდიდან ბორჯომის მუნიციპალიტეტში პირველ ეტაპზე 5 პროექტი განხორციელდება. აღნიშნული პროექტების ღირებულება ჯამში 2,557,300 ლარს შეადგენს.

„სამინისტროში 10 პროექტი გვქონდა გაგზავნილი, თუმცა პირველ ეტაპზე მხოლოდ 5 დაგვიფინანსეს“,-ამბობს ბორჯომის მუნიციპალიტეტის გამგებლი დიმიტრი ბერიძე.

მისივე თქმით, გასული წლის მსგავსად წელსაც ძირითადად გზების, ხიდების, სასმელი და საკანალიზაციო სისტემის რებილიტაცია იგეგმება.

როგორც რეგიონის მუნიციპალიტეტებში განმარტავენ გასულ წელთან შედარებით წელს გაიზარდა როგორც პროექტების რაოდენობა ასევე დაფინანსებაც.

შეგახსენებთ, რომ გასულ წელს დაფინანსებული ინფრასტრუქტურული პროექტების ნაწილი ვერ დასრულდა. მუნიციპალიტეტებიდან მოწოდებული ინფორმაციის მიხედვით რეგიონში დაგეგმილი პროექტებიდან 43 პროექტი (78%) დასრულებულია, დანარჩენი 12 (22%) პროექტის დასრულება კი გასულ წელს ვერ მოესწრო.

[მანანა სარაშვილი, ახალციხე]