ახალციხის „ოცნება“ მეუფე თეოდორეს შეხვდა

„ოცნების“ შტაბის წარმომადგენლები მეუფე თეოდორეს და ახალციხის ეპარქიის სხვა სასულიერო პირებს რეზიდენციაში ესტუმრნენ. შეხვედრას შტაბის წევრებთან ერთად მთავრობის კანცელარიის რეგიონულ და თვითმმართველობის ორგანოებთან ურთიერთობის დეპარტამენტის თავმდჯომარე ირაკლი მელაშვილი და ახალციხის მუნიციპალიტეტის საკრებულოს თავმჯდომარე ოლეგ სანდროშვილიც ესწრებოდნენ.

„ასეთი შეხვედრები მეტად გაგვაერთიანებს. ყველაზე მეტად რაც გვჭირდება, ეს არის ერთობა ერსა და ბერს შორის. ასევე, ერთობა საქართველოში მცხოვრებ ყველა ეთნიკურ თუ რელიგიურ ჯგუფს შორის. მოხარული ვარ, რომ გადაწყვიტეთ ასეთი შეხვედრის მოწყობა. სიამოვნებით მოვისმენ თქვენი სამომავლო მიზნების შესახებ“, - მიმართა მეუფე თეოდორემ შეკრებილ სტუმრებს.

შეხვედრა ნახევარ საათზე მეტ ხანს გაგრძელდა და ამ ხნის განმავლობაში რელიგიის შესახებ კანონის შეცვლაზე, ასევე ამ მიმართულებთ ქვეყანაში ბოლო დროს გაჩენილ პრობლემებზე ისაუბრეს.

„არჩევნებამდეც და არჩევნების შემდეგაც, გპირდებით, მაქსიმუმს გავაკეთებთ იმისთვის, რომ დაცული იყოს ჩვენი ქვეყნის ინტერესები. მე იმ კომისიის წევრიც ვარ, რომელიც საპატრიარქოსა და მთავრობას შორის არის შექმნილი. ბევრი საკითხია ისეთი, რომელიც არ შეიძლება გადაუწყვეტელი იყოს“, - განაცხადა ირაკლი მელაშვილმა, რომელიც მისივე თქმით, ახალციხეში გამგებლებთან დაგეგმილი შეხვედრისთვის ჩამოვიდა და მეუფესთან სტუმრად არა „ოცნების“ შტაბის დაგეგმილი შეხვედრის გამო, არამედ, მის მოსანახულებლად მივიდა.

მელაშვილი ამბობს, რომ საუბედუროდ, ძალიან ბევრი საკითხი, რომელიც მხოლოდ პოლიტიკურ ნებაზე იყო დამოკიდებული, ქვეყანაში მოუგვარებულია: „ასეთია მაგალითად ჯვრისწერა. სირცხვილია 21-ე საუკუნეში არ იყოს გარკვეული, მიიჩნევა თუ არა ჯვრისწერა იმ დაოკუმენტად, რომლითაც ოჯახის შექმნა დადასტურდება“.

შეხვედრის დასრულების შემდეგ მეუფემ „ოცნების“ წევრები დალოცა და მათ წარმატებები უსურვა: „ჩვენთან ყოველთვის მოდიან სხვადასხვა პოლიტიკოსები და არასდროს უარს არ ვეუბნებით არავის. ეკლესია არის საყოველთაო, ის არ არის კონკრეტულად რომელიმე პარტიის არც მხარდამჭერი და არც მოწინააღმდეგე. ვღებულობთ ყველას, ვინც მოვა ჩვენთან“.

კოალიცია „ქართული ოცნების“ ახალციხის შტაბის უფროსის მალხაზ ჟუჟუნაძის განცხადებით, მსგავსი ტიპის შეხვედრები დაგეგმილია როგორც სომხური სამოციქულო, ასევე კათოლიკური ეკლესიის წარმომადგენლებთანაც.

[sknews.ge]