ტაბაწყურის ახალგაზრდები ბიუჯეტის დაგეგმვაში ჩაერთვნენ

ბორჯომის მუნიციპალიტეტის სოფელ ტაბაწყურში მცხოვრები ახალგაზრდები ადგილობრივი თვითმმართველობის წევრებს დღეს ტაბაწყურის სკოლაში შეხვდნენ. მათ ბორჯომის მუნიციპალიტეტის გამგებლის მოადგილეს მათ მიერ სოფლისთვის გამოკვეთილი სამი პრიორიტეტი დაუსახელეს.

საფეხბურთო (კომბინირებული) მოედნის კეთილმოწყობა; სპორტული დარბაზის ინვენტარით აღჭურვა და სპორტული და შემეცნებითი შეჯიბრებებისა და ღონისძიებების მოწყობა - ის სამი საკითხია, რომლის მოსაგვარებლადაც ტაბაწყურის ახალგაზრდებმა თვითმმართველობას თანხების გათვალისწინება სთხოვეს. გამგებლის მოადგილე კი დაჰპირდა, რომ მათ რეკომენდაციებს 2014 წლის ბიუჯეტის შედგენისას, ”კულტურის, რელიგიის, ახალგაზრდობის ხელშეწყობისა და სპორტის” პროგრამაში აუცილებლად გაითვალისწინებენ.

ახალგაზრდებმა ბიუჯეტის დაგეგმვაში ჩართვაზე ფიქრი საქართველოს ახალგაზრდა ეკონომისტთა ასოციაციის თანამშრომლების დახმარებით დაიწყეს.

ვიდრე თვითმმართველობასთან შეახვედრებდნენ, საქართველოს ახალგაზრდა ეკონომისტთა ასოციაციის თანამშრომლებმა ახალგაზრდებთან სამი შეხვედრა გამართეს. შეხვედრების მიზანს ადგილობრივი ახალგაზრდების საჭიროებების გამოვლენა და პრიორიტეტულობის განსაზღვრა წარმოადგენდა.

პრობლემების ადგილობრივი თვითმმართველობის წარმომადგენლებთან განხილვა მომდევნო ეტაპი იყო.
როგორც ახალგაზრდა ეკონომისტთა ასოციაციაში განმარტავენ, ყველა ზემოაღნიშნული შეხვედრის საბოლოო მიზანს წარმოადგენს მუნიციპალიტეტის მიერ დაგეგმილი პროგრამების გაუმჯობესება, ბენეფიციარების უშუალო თანამონაწილეობის ხელშეწყობით, პროგრამული ბიუჯეტების დაგეგმვის პროცესში.



[sknews.ge]