ახალციხის მერი ბაღის მენეჯერებსა და შშმ პირებს შეხვდა

შეხვედრაზე, ქალაქის ბიუჯეტში საბავშო ბაღებისა და შშმ პირებისთვის გათვალისწინებულ თანხებზე იმსჯელეს. განხილვას საქართველოს ახალგაზრდა ეკონომისტთა ასოციაციის წარმომადგენლებიც ესწრებოდნენ.

„შეხვედრა GIZ-ის მიერ დაფინანსებული პროექტის ფარგლებში გაიმართა, რომელიც ითვალისწინებს მოქალაქეების ჩართულობას ადგილობრივი ბიუჯეტის დაგეგმვის პროცესში. შევარჩიეთ ორი პროგრამა: სოციალური და სკოლამდელი აღზრდის დაწესებულებების გაერთიანება“, – განმარტავს საქართველოს ახალგაზრდა ეკონომისტთა ასოციაციის განათლების ცენტრის მენეჯერი მადონა კოტია.

საბავშვო ბაღების მენეჯერებმა ბაღების პრობლემებზე ისაუბრეს.

„ჩვენი ბიუჯეტის ერთი მეოთხედი, დაახლოებით მილიონ ნახევარი სკოლამდელი აღზრდის დაწესებულებებისთვისაა გათვალისწინებული. ძირითადი კითხვები, რაც ბაღის გამგეებს ჰქონდათ იყო ხელფასების ზრდასთან დაკავშირებით. მეც ვფიქრობ, რომ ძალიან დაბალი ხელფასებია, მაგრამ მომდევნო წლის ბიუჯეტში ამის საშუალება არ არის“, – ამბობს ქალაქ ახალციხის მერი გიორგი კოპაძე და ამატებს, რომ თუ საბავშვო ბაღები სხვა მიმართულებით დაზოგავენ თანხებს და ამის ხარჯზე ხელფასები გაიზრდება, წინააღმდეგი არ იქნება.

მისივე თქმით, მომავალი წლისთვის იგეგმება ბაღების რეაბილიტაცია: „უნდა გადავწყვიტოთ, შევაერთოთ სხვადასხვა ბაღები, რომლებსაც არ აქვთ გაფართოების პერსპექტივა, ან გამოვძებნოთ ახალი ადგილები. ჯერ იგეგმება მეოთხე საბავშვო ბაღის რეაბილიტაცია. დაახლოებით ოთხ ბაღს სჭირდება შეკეთება“.

შეხვედრაზე განიხილეს სოციალური პაკეტიც. ბიუჯეტში უსინათლოებისთვის ყოველთვიურად 20–ლარიანი დახმარებაა გათვალისწინებული და ამისთვის, 13.200 ლარია განსაზღვრული.

„მათ განსაკუთრებით უჭირთ საკუთარი თავის რეალიზება. მათ არ შეუძლიათ თუნდაც სადმე მზესუმზირა გაყიდონ. ეს ჩვენთვის დიდი შეღავათია“, – ამბობს „უსინათლოთა კავშირის“ სამცხე–ჯავახეთის ფილიალისთავმჯდომარე ხათუნა ახობაძე.
შეხვედრაზე ასევე აღინიშნა, რომ შშმ პირებისთვის ქალაქის ქუჩები და შენობები ადაპტირებული არ არის, რაზეც მერიამ აუცილებლად უნდა იზრუნოს.

[თამარ თოთაძე, ახალციხე]