ტაბაწყურის საძოვრების საქმეზე ბორჯომის საკრებულოს დეპუტატი დაკითხეს

სამცხე–ჯავახეთის საოლქო პროკურატურა ტაბაწყურში საძოვრებთან დაკავშირებით, ბორჯომის მუნიციპალიტეტის გამგეობის თანამშრომელბის მიერ სამსახურეობრივი უფლებამოსილების ბოროტად გამოყენების შესაძლო ფაქტზე, საქმეს სსკ–ის 332–ე მუხლის პირველი ნაწილით იძიებს.

საქმეზე ძიება დაახლოებთ ორი წლის წინ, სახელმწიფო უსაფრთხოების სამსახურის მიერ შესული განცხადების საფუძველზე დაიწყო, ამ ხნის განმავლობაში სხვა მოწმეებთან ერთად დაიკითხა თითქმის ყველა მწყემსი, რომელიც აქ პირუტყვს აძოვებდა.

პროკურატურაში მოწმის სახით დასაკითხად ბორჯომის საკრებულოს დეპუტატი, „ლეიბორისტული პარტიის“ წევრი და გამგებლის ყოფილი მოადგილე გიუაშვილი 21 იანვარს დაიბარეს. მისი თქმით, იგი გამომძიებელი ვანო კაჭკაჭიშვილის შეკითხვებს სამი საათის განმავლობაში პასუხობდა.

„გამოძიებას აინტერესებს რამდენად სწორად ხდებოდა მაშინ აქ საძოვრების გაცემა და განაწილება. 2013 წელს, მაშინ როცა ამაზე ძიება დაიწყეს, გამგებლის მოადგილე ვიყავი და სოფლის მეურნეობის მიმართულებას ვკურირებდი. მკითხეს საძოვრების საკითხთან დაკავშირებით ვინ მოდიოდა გამგეობაში, როგორ ვაკვალიანებდით, რას იხდიდნენ, სად და რამდენს“, – ამბობს გიუაშვილი.

მისი განცხადებით, მას შემდეგ რაც ქვეყანაში ხელისუფლება შეიცვალა და „ოცნების“ მთავრობა მოვიდა, ბორჯომის გამგეობაში იმ ადამიანების რიგები იდგა, რმლებიც აქ საძოვრებს იყენებდნენ: „გვეუბნებოდნენ, წლების განმავლობაში ფულს საძოვრების გამოყენების სანაცვლოდ ვიღაცეებს ხელზე ვაძლევთ, მოგვეცით ანგარიში ნომერი, სადაც ამ თანხას ბიუეჯტის სასარგებლოდ ჩავრიცხავთო“.

გიუაშვილის მტკიცებით, სწორედ ამ პერიოდში მან ბიუჯეტის სასარგებლოდ ტაბაწყურის საძოვრებიდან მიწით სარგებლობის გადასახადი 207 000 ლარი შეიტანა: „მანამდე რომელი მაღალჩინოსნების ჯიბეში მიდიდოა ეს ფული, გამოძიებამ ძალიან კარგად იცის. გამგეობას იქ მიწები არ გაუსხვისებია და ჰექტარზე კანონით დადგენილ 17 თუ 18 ლარს ხალხს ბიუეჯტში ვახდევინებდით“.

[თამუნა უჩიძე, ახალციხე]