'არჩევნები და ახალგაზრდა ამომრჩეველი' - საინფორმაციო შეხვედრა ახალციხეში

დღეს, 17 აგვისტოს ახალციხის დემოკრტიული ჩართულობის ცენტრში გახსნილ მედიაცენტრის ორგანიზებით შეხვედრა იმ ახალგაზრდებთან გაიმართა, ვინც არჩევნებში მონაწილეობას პირველად იღებს.

საინფორმაციო სახის შეხვედრას ათამდე ადგილობრივი ახალგაზრდა დაესწრო.

ახალგაზრდებში ცნობიერების ამაღლების მიზნით, ნაჩვენები იყო საქართველოს ცენტრალური საარჩევნო კომისიის მიერ მომზადებული სასწავლო ფილმი „კენჭისყრის დღის პროცედურები“, სადაც დეტალურად იყო აღწერილი თუ როგორ იხსნება საარჩევნო უბანი, ხმის მიცემის პროცედურები და საარჩევნო უბნის დახურვა.

„ფილმის ჩვენება მოვაწყეთ ზოგადად კენჭისყრის დღეზე, თუმცა ყურადღება ხმის მიცემის პროცედურებზე გავამახვილეთ. კარგია, რომ ახალგაზრდები ინტერესდებიან ამ არჩევნებით“, - განაცხადა ახალციხე-ადიგენის 44-ე საარჩევნო ოლქის თავმჯდომარემ თეა გავაშელმა.

კენჭისყრის დღის პროცედურებთან დაკავშირებით ბევრი კითხვები არ ჰქონიათ ახალგაზრდებს. ისინი ძირითადად გადასატან ყუთებთან
დაკავშირებული პროცედურებით დაინტერესდნენ.

„პირველად ვიღებ არჩევნებში მონაწილეობას და იმისათვის, რომ მივიდე არჩევნებში და მივიღო მონაწილეობა, საკმარისი ინფორმაცია მივიღე“,-გვითხრა შეხვედრის ერთ-ერთმა მონაწილემ ხატია გიგოლაშვილმა.

საარჩევნო თემატიკაზე ახალგაზრდებთან შეხვედრა ძირითადად ფილმის ჩვენების ნაწილს მოიცავდა. ორგანიზატორების თქმით შეხვედრის მიზანს, საარჩევნო საკითხებთან დაკავშირებით იმ ახალგაზრდების ცნობიერების ამაღლება წარმოადგენს, ვინც არჩევნებში მონაწილეობას პირველად იღებს.

[ლუბა გიორგაძე, ახალციხე]