ტარიელ ნაკაიძე: ჭელაში მინარეთი აუცილებლად უნდა აღდგეს

„მინარეთი მეჩეთის განუყოფელი ნაწილია და მუსლიმური აღმსარებლობის ადამიანის ღირსება. აქედან გამომდინარე, ის აუცილებლად უნდა აღდგეს, ეს არის ჩვენი ბრძოლის მთავარი მიზანი და ყველა გზას გავივლით იმისთვის, რომ ის შეცდომა, რომელიც სახელმწიფოს მიერ იქნა დაშვებული, გამოსწორდეს“, - აცხადებს ტარიელ ნაკაიძე.

ნაკაიძე ამბობს, რომ არაერთხელ განაცხადა და კიდევ იმეორებს, რომ მინარეთი ყველა იმ წესის დაცვით დაიდგა, რა წესებითაც საქართველოში შენდება საკულტო ნაგებობები: „თუ ამ წესის მიმართ არსებობს რაიმე სახის შეკითხვა, კრიტიკა, ან პრეტენზია, მზად ვართ ეს პრეტენზიები გავითვალისწინოთ და არსებული კანონმდებლობის ფარგლებში მოვექცეთ. მაგრამ, საბოლოოდ ის, რომ მინარეთი უნდა აღდგეს, ეს არის ფაქტი“.

ტარიელ ნაკაიძე ფიქრობს, რომ მინარეთის დემონტაჟის საკითხი გასცდა რელიგიურ მომენტს და ეს არის საქართველოში მრავალფეროვნების, რელიგიური უმცირესობების საკითხის საფრთხის ქვეშ დაყენება.

კითხვაზე, როგორ ფიქრობს, გამოიწვევს თუ არა ქრისტიან მოსახლებაში მინარეთის კვლავ აღმართვა გარკვეულ პროტესტს, ტარიელ ნაკაიძე ამბობს, რომ არსებობენ ადამიანები, რომლებიც ცდილობენ აიყოლონ ქრისტიანი მოსახლეობა.

„შეხვედრებიდანაც ჩანს, რომ ზოგადად ქრისტიანი მრევლი დაპირისპირების მთავარი ღერძი არ არის. არსებობენ ადამიანები, რომლებიც ამას პროვოცირებენ და ის მრევლიც, ვინც არ არის დაპირისპირებული, იცავს იმ პოზიციას, რომ მათ გვერდით უნდა იდგეს“, - ამბობს ტარიელ ნაკაიძე.

შეგახსენებთ, 5 ოქტომბერს მუსლიმური თემის წარმომადგენლები საქართველოს პრემიერ-მინისტრს ბიძინა ივანიშვილს შეხვდნენ. შეხვედრის ერთ-ერთი თემა მინარეთის დაბრუნება იყო. შეხვედრაზე მხარეები შეთანხმდნენ, რომ მინარეთის დაბრუნება სამართლებრივ ჩარჩოებში უნდა მოექცეს.

[თამარ თოთაძე, ახალციხე]