ტარიელ ნაკაიძე: 'ჭელა კარგი პრეცენდენტია'

ტარიელ ნაკაიძის თქმით, გვიან ღამით მინარეთის აღმართვა რაიმე განსაკუთრებული მიზეზით არაა გამოწვეული.

„გუშინ იყო საუბარი, რომ ნებართვა უნდა გაცემულიყო, დღეს გაიცა ნებართვა და უნდა აღმართულიყო, დაიწყეს ამის აღმართვა ამასობაში დაღამდა. რაიმე განსაკუთრებული, რომ მაინცდამაინც ღამე უნდა გაკეთებულიყო, მსგავს ინფორმაციას არ ვფლობ“, - ამბობს ქართველ-მუსლიმთა კავშირის თავმჯდომარე.

რაც შეეხება კითხვას, სხვა სოფლებშიც ხომ არ იგეგმება მინარეთების დადგმა, ტარიელ ნაკაიძე ამბობს, რომ ეს ფინანსურ შესაძლებლობებზეა დამოკიდებული.

„საქართველოს ნებისმიერ ტერიტორიაზე, ეს იქნება ადიგენი, აჭარა თუ რომელიმე სხვა მხარე, თუ მეჩეთი არსებობს, შესაბამისად, მას სჭირდება მინარეთი. თუ ადგილობრივებს ექნებათ საშუალება, შესაბამისად, ალბათ დაიდგმება", - ამბობს ტარიელ ნაკაიძე და ამატებს, რომ ჭელა ძალიან კარგი პრეცენდენტია, რადგან საქართველოში ერთადერთი მინარეთია, რომელიც წესების დაცვით აიგო.

„თუმცა, ამით ვერ ვიტყვით იმას, რომ საქართველოში აქამდე აგებული მინარეთები რაიმე წესებს არ ექვემდებარებოდა. ის ექვემდებარებოდა იმ წესებს, რა წესებითაც შენდებოდა საკულტო ნაგებობები და მინარეთები. ის პრეცენდენტი, რასთანაც ჩვენ ახლა გვაქვს საქმე, ვგულისხმობ საკითხის საკანონმდებლო კუთხით მოგვარებას, ერთის მხრივ ძალიან კარგია, სხვა მინარეთებისა თუ მეჩეთის მშენებლობებისას ამ გამოცდილებას გავითვალისწინებთ".

მისივე თქმით, ადგილობრივ მუსლიმ თემს ბევრი ნერვიულობის გადატანა მოუხდა, მაგრამ საბოლოოდ დემოკრატიამ და ადამიანის უფლებების დაცვამ გაიმარჯვა. იგი დარწმუნებულია, რომ მინარეთის აღმართვა ქრისტიანების პროტესტს არ გამოიწვევს.

„საქართველო არის დემოკრატიული ქვეყანა. პროტესტი ნებისმიერ რამეზე შეიძლება გამოითქვას, მაგრამ ეს რამდენად ექვემდებარება სამართლებრივ ნორმას, ეს კიდევ სხვა საკითხია. ამიტომ, მე ვფიქრობ და დარწმუნებულიც ვარ, რომ მართლმადიდებელი მრევლი უფრო მეტად ხელს შეუწყობს ასეთ პროცესებს და რაიმე დაძაბულობას არ შემოიტანს“, - ამბობს იგი.

[sknews.ge]