ტარიელ ნაკაიძე: გამოდის, ყველა მინარეთი უნდა მოინგრეს

ტარიელ ნაკაიძემ შეკრებილებს სიმშვიდის დაცვისკენ მოუწოდა.

‘გვეუბნებიან, რომ დაკავებულებს რამდენიმე საათში გამოუშვებენ, ამიტომ, ხალხს მოთმინებისკენ მოვუწოდე’, - ამბობს იგი.

მისივე თქმით, თუ ვიმსჯელებთ იქიდან გამომდინარე, რომ საქართველოში არცერთი მეჩეთი და მინარეთი კანონიერად აშენებული არ არის, მაშინ გამოდის რომ ყველა უნდა დაინგრეს.

„ადამიანებმა დაიცვეს საკუთარი საკულტო ნაგებობა, სამლოცველო, რომლის შედეგიც არის ის, რომ რამდენიმე სცემეს და რამდენიმე დაკავებულია და არ უშვებენ. ჩვენ ვცდილობთ სახელმწიფოს მივაწოდოთ ინფორმაცია რა სიტუაციაა, რომ ადამიანები არიან დაკავებული და მინარეთი უნდა დაუბრუნდეს ადგილს. ეს არის კონსტიტუციით მონიჭებული უფლება. ეს არის ერთ-ერთი წვლილი საქართველოს დემოკრატიაში და ჩვენ ვერ დავთმობთ ერთი უბრალო მიზეზის გამო, იმიტომ რომ ჩვენ გვაღელვებს საქართველოს დემოკრატია“, - აცხადებს ნაკაიძე.

ნაკაიძე ამბობს, რომ ჭელაში ადგილი არ აქვს რელიგიურ დაპირისპირებას: „მე აღფრთოვანებული ვარ იმ დამოკიდებულებით, რომელიც გამოხატა ადგილობრივმა ქრისტიანულმა მოსახლეობამ. მათ დაგმეს ეს სიტუაცია და აქ არ არის რელიგიური დაპირისპირება. იმედი მაქვს, რომ მთავრობა მიიღებს გონივრულ გადაწყვტეილებას და არ მივა სიტუაცია რელიგიურ დაპირისპირებამდე“.

მისივე თქმით, სოლიდარობის ნიშნად მუსლიმები ახალციხეში დღეს საქართველოს სხვა კუთხეებიდანაც გეგმავენ ჩამოსვლას: „თუმცა, გპირდებით, რომ არცერთი ნაბიჯი არ გასცდება კონსტიტუციის ფარგლებს“.

ნაკაიძე ყურადღებას იმ ფაქტზე ამახვილებს, რომ ეს არ არის პირველი ფაქტი მუსლიმების მიმართ: „ეს არის მე-4 შემთხვევა, რომელშიც, ვფიქრობ, რომ სახელმწიფო და სხვადასხვა პირები არიან ჩარეული. შესაბამისად, არ არის ადექვატური პასუხები და მიდგომა“.

შეგახსენებთ, სამმართველოს შენობასთან დილიდან 100-მდე ადამიანია შეკრებილი, მათ გზა აქვთ გადაკეტილი. პოლიცია ცდილობს მომიტინგეებს გზის ნაწილი გაათავისუფლებინოს, იმისთვის რომ მოძრაობა არ შეფერხდეს.

[sknews.ge]