ახალციხეში საჯარო ლექცია გაიმართა

დღევანდელი შეხვედრა სამოქალაქო განათლებისა და პედაგოგთა გადამზადების პროგრამის ფარგლებში ახალგაზრდული ფორუმის ხელშეწყობის მიზნით მოეწყო. ახალციხის მუნიციპალიტეტის გამგეობის კულტურის, სპორტის, ძეგლთა დაცვისა და ახალგაზრდულ საქმეთა სამსახურის მთავარმა სპეციალისტმა რეზო ანდღულაძემ მოხსენება გააკეთა. ახალციხის მუნიციპალიტეტის გამგეობის საკონფერენციო დარბაზში გამართულ საჯარო ლექციას ახალციხის მუნიციპალიტეტის საჯარო სკოლის მოსწავლეები ესწრებოდნენ.

”ახალციხის მუნიციპალიტეტის 13 პარტნიორი სკოლის სამოქლაქო კლუბის წევრები სამცხე-ჯავახეთის ისტორიული ძეგლების სახელწოდებებს გაეცნენ, ასევე მესხი ტომების სიდიადესა და სხვადასხვა სიმბოლოების შესახებ მიიღეს ინფორმაცია, რომელიც ახალციხეში ისტორულად არსებობდა. გარდა ამისა, მოისმინეს ახალციხის ძველი სახელის ისტორიები, რომელიც ლომსიას სახელით არის მოხსენებული და ახალციხეში მოღვაწე ადამიანების ისტორიებსა და წინაპრების წარმატებებზეც ისაუბრეს”, - ამბობს ”ახალციხის ახალგაზრდული ცენტრის” წარმომადგენელი მზია ინასარიძე.

რეზო ანდღულაძის თქმით, მსგავსი შეხვედრები ახალგაზრდების დაინტერესებას გაზრდის.

”ეს არის ინტერესის გაღვიძების ერთ-ერთი მცდელობა ახალგაზრდებისთვის. მე მინდა, რომ ბავშვებს ვუთხრა, რომ მათ ჰქონდეთ ურთიერთობა საკუთარ ისტორიასთან”, - ამბობს რეზო ანდღულაძე.

[თამარ თოთაძე, ახალციხე]