განათლების სამინისტრომ საჯარო ინფორმაცია დაგვიანებით და არასრულად გასცა

განათლების სამინისტროს წერილის გამოგზავნის ბოლო ვადა 19 აგვისტოს ეწურებოდა, საჯარო ინფორმაცია კი 30 დღის დაგვიანებით გასცა.

ოფიციალური წერილით ვითხოვდით ინფორმაციას სამცხე–ჯავახეთში იმ სკოლებისა და მასწავლბელების რაოდენობის შესახებ, რომლებმაც სირვილი გამოთქვეს, დაეტოვებინათ სკოლა კომპენსაციის სანაცვლოდ. აღნიშნულზე სამინისტროსგან ვერანაირი პასუხი ვერ მივიღეთ. ოფიციალური წერილით კი გვატყობინებენ, რომ „ინფორმაცია პენსიონერი მასწავლებლების მხრიდან კომპენსაციის მიღების შესახებ მიზანშეწონილია გამოთხოვილ იქნეს ზოგადსაგანმანათლებლო დაწესებულებებიდან“.

საქართველოს ზოგადი ადმინისტრაციული კოდექსის მე–40 მუხლის თანახმად, საჯარო დაწესებულება ვალდებულია, გასცეს საჯარო ინფორმაცია დაუყოვნებლივ ან არა უგვიანეს 10 დღისა.

„საერთაშორისო გამჭვირვალობა – საქართველოს“ იურისტის გიგი ჩიხლაძის განამრტებით, საჯარო ინფორმაციის გაცემასთან დაკავშირებით ვადები მუდმივად ირღვევა სხვადასხვა სააჯრო უწყებების მხრიდან: „დაგვიანება 10 დღაინი ვადისა არის საკმაოდ ფართოდ გავრცელებული პრაქტიკა და აქვს საყოველთაო ხასიათი. შემიძლია ვთქვა, რომ ერთთვიანი დაგვიანება არაფერია. პიველ აპრილს გამოთხოვილი ინფორმაცია არ მიგვიღია ჯერ“.

გარდა ინფორმაციის დაგვიანებისა, სულ ცოტა, უცნაური იყო სამინისტროს მხრიდან ჩვენი გადამისამართება ზოგადსაგანმანათლებლო დაწესებულებებში. გამოდის, რომ სამინისტროს არ აქვს ინფორმაცია და სტატისტიკა, რამდენმა პედაგოგმა გადაწყვიტა სკოლის დატოვება და რამდენმა უნდა მიიღოს კომპენსაცია? აგრეთვე, არის თუ არა მასწავლებლების ნაკლებობა ზოგადსაგანმანათლებლო დაწესებულებებში? ან თუ აქვს ეს ინფორმაცია, რატომ არ უნდა იყოს იგი საჯარო?!

[თორნიკე ზაზაძე, ახალციხე]