ვალეში კანალიზაციიდან ამოსულმა წყალმა ცენტრალური ქუჩა დატბორა [ფოტო/ვიდეო]

სტალინის ქუჩა, ერთ–ერთი კორპუსის საკანალიზაციო მილიდან გამოსული წყლით, ნაგვითა და ფეკალური მასით, მეორე დღეა იტბორება. ადგილობრივი ლიანა ადამიანი ამბობს, რომ კანალიზაცია 18 სექტემბერს, დაახლოებით 13:00 საათზე გამოვიდა.

„სხვა საქმეზე ვიყავი გასული და დამირეკეს მაღაზია წალეკაო. ფეკალური მასა მთლიან ცენტრს ტბორავს და გზაზე გადადის, ანტისანიტარიაა“, - ამბობს ადგილობრივი ლიანა ადამიანი.

მისივე თქმთ, „გაერთიანებული წყალმომარაგების კომპანიას“ დაუკავშირდა, თუმცა მათ პრობლემა ვერ მოაგვარეს: „გუშინ წყალკანალი იყო, რაღაცა გააკეთა, მაგრამ ისევ გამოდის“.

„გაერთიანებული წყალმომარაგების კომპანიაში“ „სამხრეთის კარიბჭეს“ განუმარტეს, რომ პრობლემა მილებში დაგროვებულმა წყალმა და ნაგავმა შექმნა.

„გუშინ, გორიდან სპეცმანქანა გვყავდა, რომლითაც დავრეცხეთ საკანალიზაციო მილები მთლიან ვალეში. როგორც ჩანს, მილებში ნაგავი წამოვიდა, დაგროვდა და ამ ადგილზე გამოვიდა. ეგ რომ გუშინვე გვენახა გავწმენდდით“, - ამბობს გაერთიანებული წყალმომარაგების კომპანიის სამცხე-ჯავახეთის ფილიალის მენეჯერი, ბესო ფილაური.

მისივე თქმით, პრობლემის მოგვარებას კომპანიის თანამშრომლები ცდილობენ: „ჩვენი ჯგუფი იქ არის და გაწმენდენ მილებს. ადგილზე მანქანაა გამოძახებული და პრობლემა მოგვარდება“.


ვიდეო ადგილობრივებმა მოგვაწოდეს



[თაკო ფეიქრიშვილი, ახალციხე]