ფეკალური მასა 23-ე კორპუსის სარდაფში

ფეკალური მასა პირველი სართულზე მცხოვრებლების სახლებშიც ადის. მარინა გელაშვილის სახლში, რამდენიმე დღის წინ, აბაზანა კანალიზაციის წყლით გაივსო.

- “კანალიზაცია გაიჭედა რამდენიმე დღის წინ. ტუალეტის ტრაპიდან და ვანიდან ამოდიოდა წყალი, - ამბობს პირველ სართულზე მცხოვრები მარინა გელაშვილი და აქვე ამატებს, რომ ეს პირველი შემთხვევა არ არის. შესაბამისად, ზომებსაც თავადვე იღებენ, - ჩავედით სარდაფში და გავწმინდეთ“.

23-ე კორპუსის მცხოვრებლები ამბობენ, რომ მილების დაზიანების გამო ყოველ დილით, წყლის გამოსვლისას, კორპუსის სარდაფში წყალი გუბდება.

- “ცენტრალური მილია გამოსაცვლელი აუცილებლად“, - ამბობს დავით ლობჯანიძე.

პრობლემის მოსაგვარებლად, დახმარების თხოვნით, 23-ე კორპუსის მცხოვრებლებს არავისთვის მიუმართავთ.

- “როცა რამე ფუჭდება, ყოველთვის ჩვენი ხარჯებით ვაკეთებთ. განცხადებით არავისთვის მიგვიმართავს. არამგონია, რომ გაგვიკეთონ“, - ამბობს კორპუსის თავმჯდომარე ცისანა მოდებაძე.

ახალციხის მუნიციპალიტეტის გამგებლის მოვალეობის შემსრულებელი ბესიკ ხითარიშვილი ამბობს, რომ ამ ეტაპზე კონკრეტული გეგმის შესახებ საუბარი უჭირს. ერთადერთი, რაც შეუძლია, კორპუსს ”გაერთიანებული წყალმომარაგების კომპანიასთან” უშუამდგომლებს: ”მზად ვართ გვერდით დავუდგეთ. მაგრამ, აუცილებელია, რომ ჯერ განხადება შემოიტანონ”.

“გაერთიანებული წყალმომარაგების კომპანიაში” აცხადებენ, რომ ეს საკითხი მათ არ ეხებათ. დაზიანებული მილი მოქალაქეებმა თავად უნდა შეაკეთონ.

- ”ჩვენი კომპანია ემსახურება ქალაქის მხოლოდ გარე ცენტრალურ ქსელს. შიდა ქსელი მოქალაქეების პასუხისმგებლობის ქვეშაა და თავად უნდა მოაგვარონ ეს პრობლემა”, - განაცხადა ”გაერთიანებული წყალმომარაგების კომპანიის” სამცხე-ჯავახეთის რეგიონული ფილიალის მენეჯმა გიორგი ბაგინაშვილმა.



[ნინო ზედგინიძე, ახალციხე]