არასრულწლოვანთა დანაშაულის პრევენციის მიზნით საგრანტო კონკურსი ცხადდება

პროექტის პრეზენტაციას, რომელიც დღეს ახალციხეში, ადგილობრივი თვითმმართველობის შენობაში შედგა, ადგილობრივი არასამთავრობო ორგანიზაციების წარმომადგენლები დაესწრნენ.

პროექტი, „საზოგადოების ჩართულობისა და თანამშრომლობის პროგრამა სამართლებრივი განათლებისთვის“ (GE GALLS), რომლის მიზანია სათემო ინიციატივების ხელშეწყობა არასრულწლოვანთა დანაშაულის პრევენციის მიზნით, ასევე სასკოლო პრევენციული პროგრამებისა და განრიდებისა და მედიაციის პროგრამის განვითარების ხელშეწყობა, საქართველოს 4 ქალაქში: თელავში, ხაშურში, ახალციხესა და ფოთში ხორციელდება. ქალაქები არასრულწლოვანთა შორის დანაშაულის პროცენტულობის მიხედვით შეირჩა.

კონკურსში მონაწილოების მსურველმა უნდა შეავსოს ონლაინ სააპლიკაცია ფორმა ვებ-გვერდზე http://www.ph-int.org/ge-calls/. განაცხადის შევსებამდე მსურველმა საიტზე რეგისტრაცია უნდა გაიაროს. აპლიკაციის მიღების ბოლო ვადა 15 ოქტომბერია.

როგორც პროგრამის ხელმძღვანელი თინათინ ებანოიძე განმარტავს, პროექტებს ორი კვირის ვადაში შეარჩევენ, განხორციელება კი 10 ნოემბრიდან დაიწყება: “ჩვენი მიზანია თემის ინტერესებზე და ბავშვების ინტერესებზე მორგებული სხვადასხვა სერვისებისა და აქტივობების წახალისება“.

კონკურსში მონაწილეობა შეუძლიათ ზემოთდასახელებულ ოთხ ქალაქში მომუშავე არასამთავრობო ორგანიზაციებს და ადგილობრივ საინიციატივო ჯგუფებს. პროექტის განხორვიელების ვადები 3 და 6 თვეა და მაქსიმალური ბიუჯეტი 5.500 აშშ დოლარია.

პროექტით გათვალისწინებული ყველა აქტივობა განკუთვნილი უნდა იყოს უფროსკლასელ მოსწავლეებზე. თითოეულ ქალაქში პროგრამა შეარჩევს 5 პარტნიორ სკოლას, ყველა აქტივობაში მინიმუმ 20 მოსწავლე უნდა იყოს ჩართული.

„საკმაოდ საინტერესო პროექტია. ჩვენი ორგანიზაცია შეეცდება კონკურსში მონაწილობას.საინტერესოა ისიც, რომ საჯარო სკოლის მოსწავლეებთან მოგვიწევს ურთიერთობა და ჩვენ ამის გამოცდილება გვაქვს“,-ამბობს ახალციხის ახალგაზრდული ცენტრის კოორდინატორი მზია ინასარიძე.

„საზოგადოების ჩართულობისა და თანამშრომლობის პროგრამა სამართლებრივი განათლებისთვის“ (GE GALLS) ხორციელდება შშ-ის სახელმწიფო დეპარტამენტის ანტინარკოტიკული და სამართალდამცავ სტრუქტურებთან თანამშრომლობის საერთაშორისო ბიუროს ფინანსური მხარდაჭერით. პროგრამას ახორციელებს ამერიკული ორგანიზაცია PH International-ის ფილიალი საქართველოში.
პროგრამის პარტნიორები არიან საქართველოს შინაგან საქმეთა სამინისტრო, განათლებისა და მეცნიერების სამინისტრო, იუსტიციის სამინისტრო და სპორტისა და ახალგაზრდულ საქმეთა სამინისტრო.

[თინათინ ზაზაძე, ახალციხე]